महाशिवरात्रि पर्वमा एकल ताण्डव नृत्य तथा गायन प्रतियोगिता हुने

प्रतिकात्मक तस्वीर

पूर्वको पशुपतिनाथ ‘अर्जुनधारा जलेश्वरधाम’मा यस वर्षको महाशिवरात्रि पर्वका अवसरमा १ नम्बर प्रदेश स्तरीय एकल ताण्डव नृत्य तथा गायन प्रतियोगिता हुने भएको छ ।

फागुन २७ गते महाशिवरात्रिका दिन ‘एक साँझ शिवका माझ’ कार्यक्रमअन्तर्गत प्रतियोगिता हुने भएको हो ।


Advertisement

प्रतियोगितामा प्रथम, द्वितीय र तृतीय हुनेलाई नगद पुरस्कार क्रमशः ५१ हजार, ३१ हजार र २१ हजार तथा सान्त्वना हुने २ जनालाई जनही ५ हजार रुपैयाँ पुरस्कार प्रदान गरिने धाम समितिका अध्यक्ष नवीन गट्टानीले बताए ।

उनका अनुसार एकल शिव भजन गायन प्रतियोगितामा प्रथम, द्वितीय र तृतीय हुनेलाई नगद पुरस्कार क्रमशः ३१ हजार, २१ हजार र ११ हजार रुपैयाँ तथा सान्त्वना हुने २ जनालाई जनही २ हजार रुपैयाँ प्रदान गरिने छ ।


Advertisement

प्रतियोगितामा सहभागी हुने प्रतियोगीले ताण्डव नृत्यका लागि १ हजार र शिव भजनका लागि ५०० रुपैयाँ शुल्क बुझाउनुपर्ने समितिका कोषाध्यक्ष मनोज जोशीले बताए । दुवै प्रतियोगिताको अडिसन (प्रारम्भिक छनोट) २५ र २६ गते हुने बताइएको छ ।

दुवै विधामा ५०/५० जना सहभागी हुने अपेक्षा गरिएको उनको भनाइ छ ।

अडिसनबाट अन्तिम १० जनालाई छनोट गरिने तथा  जसमध्ये ५ जनालाई पुरस्कृत गरिने आयोजकले जनाएको छ । कार्यक्रम सम्पन्न गर्न कम्तिमा ५ लाख रुपैयाँ खर्च हुने कोषाध्यक्ष जोशीले बताए ।

धाममा २५ गते बिहान ९ बजे यज्ञ समुद्घाटन, २६ गते यज्ञ, पूजा, पाठ, हवन, रुद्राभिषेक, प्रवचन, भजन कीर्तन र २७ गते भक्तजनद्वारा जलेश्वर नाथको पूजा आराधना, जलाभिषेक, तिलक प्रसाद, धार्मिक प्रवचन साथै ४ प्रहर पूजा, विशेष रुद्राभिषेक, श्रृङ्गार, आरतीलगायत हुने बताइएको छ ।

कमेन्ट गर्नुहोस्