नेपाल अडिटर्स एशोसिएनशन (अडान) लुम्बिनी प्रदेश समितिको शनिवार बुटवलमा पाँचौ परिषद् सम्पन्न भएको छ ।

परिषद्को उद्घाटन गर्दै नेपाल अडिटर्स एशोसिएशनका केन्द्रीय प्रथम उपाध्यक्ष बद्री भट्टराई संगठन निर्माणलाई जोड दिँदै अगाडि बढ्नुपर्ने बताए । 

भट्टराईले २२ वटा सीपीई सञ्चालन हुने तयारीमा रहेको जानकारी दिए । भट्टराईले नेपाल चार्टर्ड एकाउन्टेन्ट्स संस्था ऐन २०५३ तथा नियमावलीमा रजिस्टर्ड अडिटरहरूलाई लादिएको विभेदकारी व्यवस्था खारेज गरी सबै सदस्यलाई समान अधिकार राज्यले प्रदान गर्नुपर्ने बताए । 

कार्यक्रममा अडानका केन्द्रीय उपाध्यक्ष अब्दुल कर्मी खाँले सीएहरूले वित्तीय र कानूनी दायित्वप्रति उत्तरदायी भएर काम गर्नुपर्ने बताए । उनले अडानका सदस्यहरूले क्षमता अभिवृद्धि गर्न आवश्यक रहेकोमा जोड दिए ।

अडिटर्स पेशाप्रति अवसर र चुनौती दुवै थपिँदै गएकाले लेखा परीक्षण के हो भन्ने कुरा नेपाली समाजलाई बुझाउन जरुरी रहेको खाँको जोड छ ।  

अडानका महासचिव झलकमणि लम्सालले लेखापरीक्षकहरूले सबैको भावनालाई कदर गरेर काम गर्नुपर्ने बताए ।

अडान लुम्बिनी प्रदेश कार्य समितिका अध्यक्ष गोविन्दप्रसाद रेग्मीले लुम्बिनी प्रदेशमा गैरलेखा व्यवसायीले कार्यालय खोली वा नखोली लेखापरीक्षणको नाममा अनाधिकृत रूपमा काम गरिरहेकोले त्यस्ता कार्यलाई तत्काल रोक्न र कारवाही गर्न आग्रह गरे । उनले पेशामा रहेका योग्य दर्तावाल लेखापरीक्षकलाई वर्गोन्नति गर्न आग्रह गरे । 

परिषद्मा लुम्बिनी प्रदेशका १२ वटा जिल्लाका चार्टर्स एकाउन्टेन्टहरूको सहभागिता रहेको थियो । नेपालमा करीब ७ हजार दर्तावाल लेखापरीक्षक रहेका छन् ।

अडानको पाँचौ राष्ट्रिय परिषद् फागुन २८ गते काठमाडौंमा हुँदैछ । ‘राष्ट्रिय समृद्धि र सुशासन साझा अभियान, पेशागत हकहित र क्षमता अभिवृद्धि हाम्रो अडान’ भन्ने नारा रहेको छ ।