भारतको जम्मु कश्मीरका केही कुख्यात आतंकवादी संगठनहरूले नेपाल र भारतको सीमा क्षेत्रमा आतंकवादमा लगानी गर्नका लागि काम गरिरहेको भारतीय सञ्चारमाध्यमले खबर दिएका छन् । 
 

सुरक्षाबलहरूले गरेको आरम्भिक छानबिनमा बिहारी युवालाई नेपालबाट जम्मु कश्मीरमा नक्कली भारतीय मुद्रा पुर्‍याउन कमिसनका रूपमा राम्रो पैसा दिने गरिएको खुलासा भएको छ । 

एक आरोपित मोहम्मद परवेजसँग सोधपुछका क्रममा यो खुलासा भएको हो । 
 

परवेजलाई अररिया जिल्लामा नेपाल भारत सीमा नजिक चौकी क्षेत्रमा एसएसबीले समातेको हो । उनबाट ५००.६५ लाख नक्कली भारु जफत गरिएको छ । 
 

केरकारका क्रममा परवेजले जम्मु कश्मीर तथा महाराष्ट्रका केही मानिसको बैंक खातामा निजी बैंकहरूको ग्राहक सेवा विन्दुको प्रभारीमार्फत पैसा जम्मा गर्ने गरेको बताए । प्रहरीले परवेजको मोबाइल जफत गरेको छ र त्यसमा अकाउन्ट नम्बर पनि पाइएको छ । 

एसएसबीको ५२औं बटालियनका सेकेन्ड कमान्डर ब्रजेश कुमार सिंहले परवेजलाई नेपालबाट भारतीय क्षेत्रमा मोटरसाइकल चढेर प्रवेश गर्दै गर्दा पक्राउ गरिएको बताए । प्रहरीलाई देखेर भाग्ने कोशिश गर्दा पछ्याएर पक्राउ गरिएको थियो । 
 

अररिया जिल्लाको सिकटी थाना क्षेत्र अन्तर्गत वडा नम्बर १३ मा बस्ने परवेजलाई आरम्भिक सोधपुछपछि जिल्ला प्रहरीसमक्ष सुम्पिइएको थियो । 
 

सिकटी प्रहरी चौकीका थानेदार ओमप्रकाशका अनुसार, परवेजले मोरङको रंगेलीमा एक गहना व्यापारीबाट नक्कली भारतीय मुद्रा लिने गरेको थियो । उनको दाइ मोहम्मद तबरेज पनि लामो समयदेखि यस धन्धामा संलग्न थियो । 
 

आईबी तथा अन्य सुरक्षा निकायले पनि परवेजलाई सोधपुछ गरिरहेको बताइएको छ । 

ठूलो संख्यामा नक्कली नोट यसरी फेला परेपछि नेपाल भारत सीमामा निगरानी बढाइएको छ । सुरक्षा संवेदनशीलता रहेका क्षेत्रमा २४ घन्टा नै गश्ती भइरहेको भारतीय सुरक्षाकर्मीहरूले जनाएका छन् ।