भूकम्पका कारण घरमा क्षति भएर मर्मतसम्भार मात्र गर्न निवेदन दिएकामध्ये ५४५ जनाले नयाँ घर बनाउनका लागि अनुरोध गरेका छन् ।

शुरूमा सामान्य मर्मतसम्भारबाट घर बनाउने भनिए पनि पछि उनीहरूले पूरै घर निर्माणका लागि निवेदन दिएका हुन् ।

राष्ट्रिय पुनर्निर्माण प्राधिकरण जिल्ला आयोजना कार्यान्वयन एकाइ चितवनमा घर मर्मतका लागि आवेदन दिएका १ हजार ३७८ मध्ये ५४५ जनाले पूरै घर बनाउन निवेदन दिएका हुन् ।

एकाइका इञ्जिनीयर सुवास नेपालका अनुसार निवेदन परेकामध्ये २८३ को नाम प्राधिकरणबाट स्वीकृत भइसकेको छ । १६२ जनाको नाम पठाइसकिएको र अन्य १०० जनाको नाम पठाउने तयारीमा रहेको उनले जानकारी दिए ।

घर मर्मत मात्रै गर्ने निवेदन दिएका (प्रबलीकरणमा परेका) मध्ये १७ जनाले दोस्रो किस्ता बापतको रकम समेत निकासा गरिसकेका छन् ।

घर प्रबलीकरण गर्नेहरूले पहिलो र दोस्रो किस्ता क्रमशः ५०/५० हजार रुपैयाँ अनुदान पाउने छन् । नयाँ घर बनाउनेहरूले भने ३ किस्ता गरेर ३ लाख रुपैयाँ पाउने छन् । सेवाग्राहीमध्ये ९८ जनाको नाम हटाउनका लागि सिफारिस गरिएको छ ।

सेवाग्राही सम्पर्कमा नआएका कारण उनीहरूको नाम हटाइएको छ ।
 
जिल्लामा भूकम्पको समयमा ७ हजार ८६० घर पुनर्निर्माण गर्नुपर्ने भएको थियो । तीमध्ये हालसम्म ६ हजार २०२ घर पुनर्निर्माणको काम सम्पन्न भएको छ । घर निर्माण सम्पन्न हुनेमा ८२ दशमलव ९ प्रतिशत रहेको नेपालले बताए ।

उनका अनुसार पुनर्निर्माणतर्फ पहिलो किस्ता ७ हजार ५५५ र दोस्रो किस्ता ६ हजार ६२४ को निकासा भइसकेको छ ।
 
उनीहरूले पहिलो, दोस्रो र तेस्रो किस्तावापत क्रमशः ५० हजार, १ लाख ५० हजार र १ लाख रुपैयाँ पाउने छन् । पुनर्निर्माणतर्फ ३०५ जनाको नाम लाभग्राहीबाट हटाउनका लागि सिफारिस गरिएको छ ।

भूकम्पका कारण जिल्लाका ७ वटै पालिका प्रभावित भएका थिए । तीमध्ये जिल्लाको पहाडी क्षेत्रमा रहेको इच्छाकामना गाउँपालिका बढी प्रभावित भएको थियो ।