भारतका प्रधानमन्त्री नरेन्द्र मोदीले मार्च महिनाको २६ र २७ मार्चमा बंगलादेशको भ्रमण गर्नेछन् । 

कोभिड महामारीपछि मोदीको यो पहिलो विदेशयात्रा हुनेछ । 

मोदीको बंगलादेश यात्रा पश्चिम बंगाल विधानसभा निर्वाचनसँग जोडिएको छ । उनले बंगलादेशमा मतुआ समुदायसँग जोडिएका स्थानहरूको यात्रा गर्नेछन् । यस समुदायले बंगालमा ७० भन्दा बढी सीटमा महत्त्वपूर्ण भूमिका निर्वाह गर्ने गरेको छ । 

मार्च २७ मा मोदी बंगलादेशको गोपालगंजमा मतुआ समुदायका धर्मगुरु हरिचन्द्र ठाकुरको जन्मस्थल र यस समुदायको तीर्थस्थलमा जानेछन् । उनीसँग मतुआ समुदायका प्रतिनिधि शान्तनु ठाकुर पनि हुनेछन् । शान्तनु हरिचन्द्र ठाकुरकै वंशज हुन् । 

उनले मतुआ समुदायलाई नागरिकता दिने विषयमा पनि केही घोषणा गर्ने अपेक्षा छ । 

सन् २०१९ को लोकसभा निर्वाचनमा मोदीले पश्चिम बंगालमा चुनावी अभियान शुरू गर्दा मतुआ सम्प्रदायको १०० वर्ष पुरानो मठमा बोरो मांको आशीर्वाद लिन गएका थिए । 

भाजपाले बोरो मांका नाति शान्तनु ठाकुरलाई उम्मेदवार बनाएको थियो र पहिलोपटक बोंगन सीट पनि जित्यो । 

त्यसैगरी केन्द्रीय गृहमन्त्री अमित शाह डिसेम्बर महिनामा पश्चिम बंगाल जाँदा मतुआ समुदायका एक व्यक्तिको घरमा भोजन गरेका थिए । 

पश्चिम बंगालको राजनीतिमा मतुआ सम्प्रदाय महत्त्वपूर्ण छ । भाजपा आदिवासी र अनुसूचित जाति समुदायका मानिसमा ध्यान दिँदै २०० सीट जित्ने मिसन पूरा गर्न चाहन्छ । 

सन् २०११ को जनगणना अनुसार, पश्चिम बंगालमा अनुसूचित जातिको संख्या लगभग १.८४ करोड छ र त्यसमा ५० प्रतिशत मतुआ सम्प्रदायका मानिस छन् ।