वैदेशिक रोजगारी छाडेर च्याउ खेतीतर्फ आकर्षित

प्रतिकात्मक तस्वीर

रोजगारीको खोजीमा युवा विदेशिने क्रम बढिरहेका अवस्थामा पर्वतका एक युवा भने व्यावसायिक च्याउ खेती गर्दै अरुका लागि पनि अनुकरणीय बनेका छन् ।

पर्वतको फलेवास नगरपालिका–९ भङ्गरका ४० वर्षीय कृष्णप्रसाद सुवेदी डेढ दशकअघि ३ वर्ष वैदेशिक रोजगारीमा मलेसिया गएका थिए ।


Advertisement

वैदेशिक रोजगारीले उनलाई स्वदेशमा नै केही गर्नुपर्छ भन्ने सिकायो । विदेशको अनुभव र भोगाइ बटुल्दै फर्केका सुवेदी त्यसपछि भने कहिल्यै विदेश गएनन् ।

त्यसपछि च्याउ खेतीमा लागेका सुवेदी हाल दाजुभाइ च्याउ फर्म सञ्चालन गर्दै यसको व्यावसायिक खेतीमा निरन्तर लागेका छन् । ‘मलेसियाबाट फर्केलगत्तै पोखराको मझेरी पाटनमा २ रोपनी जग्गा लिएर शुरू गरेको च्याउ खेतीले अन्ततः मलाई यसको व्यावसायिक खेतीतर्फ आकिर्षत गर्‍यो,’ उनले भने, ‘त्यसयताको १५ वर्षे समयावधिमध्ये विभिन्न स्थानका साथै पछिल्ला ६ वर्षको समय पोखरा महानगरपालिका–१९ चितेपानीमा च्याउखेती गरें ।’


Advertisement

यस वर्षदेखि पोखरा महानगरपालिका–३३ बागमारास्थित महाकाली चोकमा च्याउ खेती शुरू गरेको उनले जानकारी दिए ।
    
व्यावसायिक च्याउ खेतीमा राम्रो सम्भावना भएर नै आफूले डेढ दशक यसैमा समय बिताएको अनुभव सुनाउँदै उनले कोरोना महामारीभन्दा अघिसम्म यस व्यवसायबाट मासिक २ लाख रुपैयाँसम्म आम्दानी हुने गरेको जानकारी दिए । 

‘कोरोना शुरू हुनुभन्दा अघिसम्म मासिक २ लाख रुपैयाँसम्म आम्दानी हुने गरे पनि कोरोना महामारीका कारण त्यसयता हालसम्म नै मासिक २ लाखकै हाराहारीमा घाटा व्यहोर्दै आएको छु,’ उनले भने, ‘आगामी दिनमा कोरोना महामारीको प्रभाव कम हुँदै व्यवसाय पूर्ववत् रूपमा फर्कने आशा गरेको छु ।’
    
कोरोना महामारीका कारण बीचमा भएको लकडाउनका कारण च्याउ खेतीका लागि आवश्यक पर्ने सामान ढुवानी लगायतमा समस्या झेल्नुपरेको उनले सुनाए । बन्दाबन्दी पहिला च्याउ खेतीका लागि आवश्यक पर्ने पराल प्रतिट्रक ५० हजार रुपैयाँमा पाइने गरेकोमा अहिले भने १ लाख रुपैयाँ पर्ने गरेको उनले जानकारी दिए ।

ट्रकमा पराल ढुवानीका क्रममा बाहिर निस्केमा सडक सुरक्षा जाँचका क्रममा जरिवाना तिर्नुपर्ने लगायतका झन्झटका कारण गाडीवाला पराल बोक्न गाह्रो मान्ने गरेको र ढुवानीमा बढी रकम तिर्नुपरेको उनले गुनासो सुनाए ।

कमेन्ट गर्नुहोस्