नरेन्द्र मोदी सरकारले काराकोरम पास नजिकको रणनीतिक विन्दुका रूपमा रहेको देप्साङ चीनलाई सुम्पेको आरोप भारतको विपक्षी दल कांग्रेसका नेता राहुल गान्धीले लगाएका छन् । 

चिनियाँ जनमुक्ति सेनाले उक्त क्षेत्रमा उपस्थिति बढाएको विषयमा लेखिएको एक आलेखको लिंक ट्विटरमा शेयर गर्दै राहुलले मोदी सरकार चीनसमक्ष झुकेको भन्दै आलोचना गरे । 

‘चीनले परम्परागत तथा साइबर बलहरू परिचालन गरेर भारतलाई धम्क्यायो अनि भारत सरकार झुक्यो । मेरो कुरालाई ध्यान दिनुस्, देप्साङमा हामीले भूमि गुमायौं । दौलड बेग् ओल्डी जोखिमको स्थितिमा छ । भारत सरकारको कायरताले भविष्यमा त्रासद परिणाम ल्याउनेछ,’ उनले लेखे । 
 

China mobilized its conventional & cyber forces to threaten India. GOI buckled.

Mark my words, our land in Depsang is gone and DBO is vulnerable.

GOI’s cowardice will lead to tragic consequences in the future. pic.twitter.com/zkLIEg850I

— Rahul Gandhi (@RahulGandhi) March 3, 2021

देप्साङ भारतको दौलत बेग ओल्डी हवाईपट्टी नजिक रहेको छ । त्यो सबै मौसममा उपयोग गर्न मिल्ने अनि भारत, पाकिस्तान र चीनको नियन्त्रणमा रहेको भूभागको त्रिकोणीय विन्दु हो । 

हालै सिन्थेटिक एपर्चर राडारका तस्वीरहरूमा चिनियाँ पोस्ट देखिन्छ । वास्तविक नियन्त्रण रेखा नजिक चिनियाँ सेनाको उपस्थिति बाक्लिएको देखिएको छ । पछिल्लो तस्वीरमा थप संरचनाहरू, शिविरहरू, वाहनहरू र तारबारहरू बनाइएको देखिन्छ । 

भारतले देप्साङ, गोगरा र हट स्प्रिङ्स लगायतका तनावग्रस्त क्षेत्रबाट सेना पछि हटाउने काम गर्नुपर्ने र डिएस्केलेसन गरी वास्तविक नियन्त्रण रेखालाई शान्तिपूर्ण बनाउनुपर्ने बताउँदै आएको छ ।