प्रधानमन्त्री केपी शर्मा ओलीविरुद्ध सर्वोच्च अदालतमा विचाराधीन अदालतको अवहेलनासम्बन्धी मुद्दा शुक्रवार पेशीमा चढे पनि सुनुवाइ हुन भने सकेन ।

न्यायाधीशद्वय ईश्वरप्रसाद खतिवडा र हरि फुयाँलको संयुक्त इजलासमा परेको उक्त मुद्दा शुक्रवार 'हेर्न नभ्याइने'मा राखिएको हो ।

प्रतिनिधि सभा विघटनविरुद्धका रिटमा सर्वोच्च अदालतमा सुनुवाइ भइरहेका बेला वयोवृद्ध वरिष्ठ अधिवक्ता कृष्णप्रसाद भण्डारीले गरेको बहसलाई 'तमासा' भनेपछि वरिष्ठ अधिवक्ता कुमार शर्मा आचार्य र अधिवक्ता कञ्चनकृष्ण न्यौपानेले अदालतको अवहेलनासम्बन्धी मुद्दा दायर गरेका थिए ।

यसअघि मुद्दाको प्रारम्भिक सुनुवाइका क्रममा ओलीविरुद्ध कारण देखाऊ आदेश जारी भएको थियो ।

ओलीले आफैं सर्वोच्च अदालत पुगेर लिखित जवाफ पनि पेश गरिसकेका छन् ।

उनले आफूले अदालतको अवहेलना गर्छ भनेर सोच्नु नै दुराशयपूर्ण भएको जिकिर लिखित जवाफमा गरेका छन् ।