नेपाली सेनाले दुग्ध विकास संस्थान (डीडीसी) को दूध तथा दुग्धजन्य पदार्थ खरिद गर्न थालेपछि दूधको बजार विस्तार भएको छ। कोभिड–१९ का कारण दूध तथा दुग्धजन्य पदार्थको बिक्री वितरणमा आएको ह्रासपछि कृषि तथा पशुपन्छी विकास मन्त्रालयले औपचारिक बजारको खोजीमा लागेको थियो। 

त्यसक्रममा गत फागुनको पहिलो साता मन्त्रालयले गृह, रक्षा तथा शिक्षा मन्त्रालयलगायत अन्य निकायसँग दूध तथा दुग्ध पदार्थ खरिद गर्न आग्रह गरेको अनुसार नेपाली सेनाले डीडीसीको दूध प्रत्यक्ष खरिद गर्न थालेको हो। 
कृषि मन्त्रालयले यी तीनवटै मन्त्रालयका पदाधिकारी तथा त्यस मातहतका निकायसँग छलफल गरी दूध तथा दुग्ध पदार्थ खरिदका लागि आग्रह गरेपछि नेपाली सेनाले डीडीसीबाट उत्पादित दूध तथा दुग्धजन्य पदार्थ खरिद सुरु गरेको थियो।

नेपाल प्रहरी, सशस्त्र प्रहरी तथा शिक्षा मन्त्रालयका अन्य निकाय पनि खरिद गर्न सकारात्मक भए पनि तिनीहरूको प्रक्रिया लामो भएकाले समय लागिरहेको  कृषि मन्त्रालयका सहसचिव डा. विमल निर्मलले जानकारी दिए । गोरखापत्रमा खबर छ ।