नेपाल खानेपानी संस्थानले विभिन्न पदमा स्थायी पदपूर्तिका लागि लिखित परीक्षा लिएको १२ वर्षपछि मात्र अन्तर्वार्ता लिएर नियुक्तिका लागि सिफारिश गरेको छ ।

२०६६ सालमा विभिन्न पदका लागि विज्ञापन प्रकाशित गरेर लिखित परीक्षा लिएको भएपनि १२ वर्षपछि अन्तर्वार्ता लिएर नियुक्तिका लागि सिफारिश गरिएको छ ।

यसरी सिफारिश गर्दा कतिपय आवेदकले अब उमेर हदका कारण २ देखि ५ वर्षसम्म मात्र जागिर खान पाउने भएका छन् ।

नेपाल खानेपानी संस्थानको संस्थागत सेवा महाशाखाका प्रशासन प्रमुख त्रिदेवकुमार श्रेष्ठका अनुसार सिफारिश गरिएका कर्मचारीहरूमध्ये दुईजना कार्यालय सहयोगीको जागिर अवधि दुई वर्ष मात्र बाँकी रहनेछ ।

'कार्यालय सहयोगी अर्थमान तामाङ र मिटर रिडर शम्भुजंग राणाको जागिर अवधि दुई वर्ष मात्र बाँकी छ,' श्रेष्ठले लोकान्तरसँग भने, 'दुई वर्ष भएपनि जागिर खान्छु भनेर उहाँहरूले नियुक्ति लिनु भएको छ ।'

अन्य केहीले ५ वर्ष मात्र जागिर खान पाउने भएका छन् भने केहीको २० वर्षसम्म समेत उमेरले समस्या नपर्ने अवस्था रहेको उनले बताए ।

२०६६ सालमा संस्थानले विभिन्न पदका लागि विज्ञापन प्रकाशित गरेको थियो ।

प्रकाशित विज्ञापनका आधारमा लोक सेवा आयोगले लिखित परीक्षा समेत लिएको थियो । तर, २०६८ सालमा संस्थानले ओएमएन गर्दा परीक्षाको अन्य प्रक्रिया स्थगित गरिएको थियो ।

त्यसपछि केही उम्मेदवारले २०६८ सालमा परीक्षा सम्पन्न गरेर नियुक्ति प्रक्रिया अगाडि बढाउनुपर्ने माग गर्दै सर्वोच्च अदालतमा मुद्दा दिएका थिए ।

फरक-फरक विज्ञापनमा २०७४ साल साउन २९ गते र २०७४ साल चैत्र १३ गते सर्वोच्च अदालतले भर्ना प्रक्रिया अगाडि बढाउनुपर्ने फैसला गरेपछि त्यसैको आधारमा अन्तर्वार्ताको प्रक्रिया अगाडि बढाएको श्रेष्ठले बताए ।

सोही फैसला अनुसार विज्ञापन नम्बर ५९/०६६/६७ (खुला/समावेशी), प्रशासन सेवा, तह एक, कार्यालय सहयोगी पदको माग पद संख्या सिमित-२८, खुला-१५, महिला-४, आदिवासी जनजाति- ३, मधेशी- ३, दलित-१, अपाङ्ग -१, पिछडिएको क्षेत्र-१ गरी कुल ५६ पदका लागि २०६६ सालमा लिइएको लिखित परीक्षाबाट उत्तीर्ण भएका उम्मेदवारहरूको २०७७ पुस ९ गतेदेखि २९ गतेसम्म लिइएको अन्तर्वार्तामा उपस्थित १७४ जना उम्मेदवारबाट ५६ जनालाई स्थायी नियुक्तिका लागि २०७८ वैशाख ४ गते सिफारिश गरिएको थियो ।

त्यसैगरी मेकानिकल इञ्जिनीयरमा १ जना, सहायक प्रशासक अधिकृतमा १ जना, सहायक लेखा अधिकृतमा १ जना, सिनियर मिटर रिडरमा ४ जना, सिनियर प्लम्बरमा ५ जना, सहायक लेखामा ४ जना, जुनियर प्लम्बरमा ८ जना गरी कुल १ सय जनालाई स्थायी नियुक्तिका लागि सिफारिस गरिएको छ । वरिष्ठ सहायक प्रशासनमा ४ पदका लागि भएको लिखित परीक्षामा नै कोही पनि उत्तीर्ण नभएका कारण अन्तर्वार्ता नलिइएको श्रेष्ठले बताए ।