प्रधानमन्त्री केपी ओलीले फागुन २३ पछि प्रतिनिधिसभामा तेस्रो दलको हैसियतमा पुगेको नेकपा माओवादी केन्द्र, एमाले विभाजन गर्ने एक सूत्रीय अभियान लागेको आरोप लगाएका छन् ।  प्रधानमन्त्रीबाट आफूलाई हटाउने अभियानमा पनि सो पार्टी केन्द्रीत रहेको उनको आरोप छ ।

 ‘ऊ विदेशी शक्तिका लागि ‘कम्फर्टेबल सरकार’ बनाउन तयार छ’, ओलीले सोमबार महाधिवेशन आयोजक समितिको बैठकमा पेश गरेको राजनीतिक प्रतिवेदनमा भनेका छन्, ‘प्रधानमन्त्रीको प्रस्ताव बोकेर विभिन्न दलहरुका ढोकामा पुग्छ । आफू नेकपा (एमाले) समेतको समर्थनबाट विजयी भएको तथ्यलाई लत्याउँदै राजनीतिक स्थायित्वका पक्षमा उभिएका नेताहरुलाई कार्बाही गर्छ । बेलाबेलामा प्रचण्डबाट प्रकट हुने ‘अर्को जनयुद्ध’, ‘अर्को विद्रोह’ का अभिव्यक्ति हताशाका अभिव्यक्ति बाहेक केही होइनन्।’

 वाह्य शक्तिको आडमा मुलुकमा राजनीतिक अस्थिरता फैलाउने, जातीय–क्षेत्रीय द्वन्द्व चर्काएर राजनीतिक अभीष्ट पूरा गर्ने र प्रत्येक राजनीतिक दलहरु भित्र विभाजन ल्याउने र यसबाट आफ्नो स्वार्थसिद्धि गर्न अभ्यस्त कतिपय नेताहरु सो दाउपेच निष्प्रभावी हुँदै गएका कारण अतालिएको पनि ओलीले बताएका छन् ।

माओवादी केन्द्रको भूमिका आगामी दिनमा झनै नकारात्मक एवं विभिन्न शक्ति केन्द्रका लागि सहयोगी हुने सम्भावना रहेको ओलीको दावी छ।  यस्ता अवसरवादी र हानिकारक प्रवृत्तिको आलोचना गर्दै माओवादभित्रका सकारात्मक पक्षलाई एकतावद्ध बनाउने प्रयासलाई जारी राख्नुपर्ने ओलीले बताएका छन् ।