प्रधानमन्त्री तथा एमाले अध्यक्ष केपी शर्मा ओलीले जनता समाजवादी पार्टी (जसपा) मा अन्योलताको अवस्था रहेको टिप्पणी गरेका छन्  । उनले जसपाको महन्थ ठाकुर समूहप्रति नरम भएपनि उपेन्द्र यादव र बाबुराम भट्टराई समूहप्रति आक्रामक रुपमा प्रस्तुत भएका छन् ।  ‘जसपाको पक्ष राजनीतिक स्थायित्व र लोकतन्त्रको सुदृढीकरणका लागि सरकारसँग रचनात्मक संवाद गर्न तयार देखिएको छ भने केही नेताहरु सरकारको विरोधको एकसूत्रीय अभियानमा केन्द्रित देखिन्छन्’, ओलीले आफ्नो राजनीतिक प्रतिवेदनमा भनेका छन् ।

उनले राजतन्त्र पुनरुत्थानको  माग र पश्चगामी राजनीतिको पक्षमा रहेका केही समूह तथा दलहरु पनि क्रियाशील रहेको बताएपनि उनीहरुबारे थप उल्लेख गरेका छैनन् ।

उनले संवैधानिक उच्च ओहदामा रहिसकेका व्यक्तिहरु पनि सरकारको विरोधमा देखिएको भन्दै स्वतन्त्र, व्यवसायिक र निष्पक्ष रहनु पर्ने मिडियालाई समेत सरकार विरुद्ध परिचालित गर्ने कोशिस भएको उल्लेख गरेका छन् ।  जनतामा निराशा र समाजमा भ्रम पैदा गर्दै मुलुकलाई पुनः अस्थिरतातिर धकेल्न विभिन्न कोणबाट भइरहेका यस्ता क्रियाकलापप्रति सजग रहनुपर्ने उनको जोड छ ।