जनता समाजवादी पार्टी (जसपा)का अध्यक्ष महन्थ ठाकुर पक्षका नेताहरूले मंगलवार प्रधानमन्त्री केपी शर्मा ओलीसँग लामो छलफल गरेका छन् ।

प्रधानमन्त्री निवास बालुवाटारमा बिहान ११ बजेदेखि झण्डै साढे २ घण्टा छलफल भएको जसपाका एक नेताले लोकान्तरलाई जानकारी दिए । 

लुम्बिनी प्रदेशमा जसपा सांसद मुख्यमन्त्री शंकर पोखरेल नेतृत्वको सरकारमा सहभागी भएको भोलिपल्ट बालुवाटारमा सहकार्यबारे लामो छलफल भएको हो ।

बैठकका अध्यक्ष ठाकुरका अतिरिक्त राजेन्द्र महतो लगायतका नेताहरू पनि सहभागी थिए । 

‘कार्यदल स्तरमा भएको छलफल र नेताहरूबीच भएको कुराकानीबारे समीक्षा भयो,’ जसपाका ती नेताले लोकान्तरसँग भने, ‘राम्रो र सकारात्मक दिशामा छलफल अगाडि बढिरहेको छ ।’

मधेश आन्दोलनका क्रममा कार्यकर्तामाथि लागेको मुद्दा फिर्ता र संविधान संशोधनका लागि पुनरवलोकन आयोग गठन गर्नेबारे छलफल सहमतिउन्मुख भएको जसपा स्रोतले बतायो ।

जसपा नेताहरूसँगको छलफलमा प्रधानमन्त्रीसहित सरकारी कार्यदलका सदस्यहरू पनि सहभागी थिए ।