आदेश पालना नगरे कठोर कदम उठाउन सरकार बाध्य हुनेछ : स्वास्थ्यमन्त्री त्रिपाठी

स्वास्थ्य तथा जनसंख्या मन्त्री हृदयेश त्रिपाठीले सरकारले कोभिड–१९ को रोकथाम र नियन्त्रणका लागि जारी गरेको आदेश पालना गर्न आग्रह गरेका छन् ।

मंगलवार मन्त्रालयमा आयोजित भर्चुअल पत्रकार सम्मेलनमा उनले सबैलाई आदेश पालना गरी सरकारले कोभिड–१९ रोकथाम र नियन्त्रण गर्न चालेको कदममा सहयोग गर्न आग्रह गरे ।


Advertisement

मन्त्रिपरिषद्को सोमवार बसेको बैठकले कोरोना भाइरस रोकथाम र नियन्त्रणका लागि संक्रामक रोग ऐन २०२० को दफा २ ले दिएको अधिकार प्रयोग गरी ३० बुँदे आदेश जारी गरेको थियो ।

मन्त्री त्रिपाठीले कोरोना भाइरसले हुने ठूलो चुनौती रोक्न आदेश जारी गरिएकाले त्यसको सबैले पालना गर्नुपर्ने बताए ।

उनले आदेश पालना गरे मात्र कोभिड–१९ भाइरसलाई पराजित गर्न सकिने भन्दै आदेश पालनामा कतै कमजोरी देखिए त्यसले मुलुक ठूलो दुष्चक्रमा फस्ने समेत चेतावनी दिए ।

‘सबैलाई म आग्रह गर्नु चाहन्छु कि सरकारले जारी गरेको जनस्वास्थ्यका मापदण्ड पूर्णरूपमा पालना गर्नुहोस्,’ उनले भने, ‘आदेश पालना नगरे कठोर कदम उठाउन सरकार बाध्य हुनेछ ।’

मन्त्री त्रिपाठीले कोभिड–१९ संक्रमणलाई हल्कारूपमा नलिन र हल्का ढंगले लिए संक्रमण अझ बढ्न गई स्थिति गम्भीर बन्ने समेत बताए ।

उनले जनताको जीवन जोगाउनका लागि नै सरकारले आदेश जारी गरेको बताए । उनले सरकारको बन्दाबन्दी गर्ने कुनै चाहना नभएको पनि उल्लेख गरे ।

‘बन्दाबन्दीले हाम्रो जीवनलाई कस्तो असर गर्‍यो भन्ने कुरा हामीले विगतको अभ्यासबाट थाहा पाएका छौं । हामी भरसक बन्दाबन्दी गर्ने पक्षमा छैनौं,’ उनले भने । 

सो अवसरमा मन्त्रालयका सचिव लक्ष्मण अर्यालले ५ हप्तादेखि संक्रमण बढेकाले स्वास्थ्यका मापदण्ड पालना गर्न आग्रह गरे । उनले संक्रमणको नयाँ स्वरूप देखिएकाले सचेत रहनुपर्नेमा जोड दिए । मंगलवार देशभर १ हजार ७३६ संक्रमित फेला परेका छन् ।

कमेन्ट गर्नुहोस्