प्रधानमन्त्री एवं नेकपा एमालेका अध्यक्ष केपी शर्मा ओली र नेता माधवकुमार नेपालबीच लामो संवादहीनता तोड्दै बुधवार भेटवार्ता भएको छ । काठमाडौंको नागपोखरीस्थित एक पाँचतारे होटलमा बुधवार साँझ नेताद्वय बीच झण्डै २ घण्टा वार्ता भएको थियो ।

नेकपा एमालेको विवाद उत्कर्षमा पुगेको समयमा ओली र नेपालबीच बुधवार भएको वार्तालाई अर्थपूर्ण रुपमा हेरिएको छ । नेकपा स्थापना दिवसको पूर्वसन्ध्यामा दुइ नेताहरुबीच पार्टीभित्रको विवादलाई लिएर छलफल भएको हो । नेकपा स्थापना दिवसको अवसरमा भोलि केपी ओलीले बल्खुमा पार्टी कार्यालयको शिलान्यास तथा दिउँसो थापाथलीस्थित भाडाको भवनका एमालेको नयाँ कार्यालयको उद्घाटन गर्दैछन् ।

ओलीसँगको भेटबारे नेता नेपालले भोलि आफूपक्षीय नेताहरुसँग छलफल राखेको उनीनिकट स्रोतले बतायो । बैठकपछि बाहिरिने क्रममा नेता नेपालले पत्रकारहरुलाई कुनै प्रतिक्रिया दिएनन् । भेटको प्रवन्ध गरेका मोतीलाल दुगडले दुवै नेताहरुले प्रफुल्ल मुद्रामा कुरा गरेको बताए ।

ओली र नेपालबीच ३५ दिनपछि औपचारिक वार्ता भएको हो । यसअघि गत चैत्र २ गते धुम्वराही स्थित पार्टी कार्यालयमा छलफल भएको थियो । पार्टीसहित विपरितका गतिविधिमा सहभागि भएको भन्दै ओलीले नेपाल सहित ४ जना नेतालाई निलम्बन गरेका छन् । नेपाल पक्षका २७ जना सांसदलाई तीन दिने स्पष्टीकरण सोधिएको छ ।

माधव नेपाल पक्षले एमालेलाई सर्वोच्च अदालतको आदेश अनुसार २०७५ जेठ २ गतेकै अवस्थामा फर्काउनु पर्ने अडान राख्दै आएको छ ।

थप समाचार

ओली–नेपाल वार्ताः प्रफुल्ल मुद्रामा होटल मेरियटबाट बाहिरिए दुबै नेता