ओलीसँगको वार्तापछि माधव नेपालको प्रतिक्रिया– ‘कुराकानीमा कुनै प्रगति छैन’

पार्टीभित्रको विवाद उत्कर्षमा पुगेको समयमा सहमतिको प्रयासस्वरूप प्रधानमन्त्री एवं नेकपा अध्यक्ष केपी शर्मा ओली र नेता माधवकुमार नेपालबीच दोस्रो दिन पनि वार्ता भएको छ । 

काठमाडौंको नागपोखरीस्थित म्यारियाट होटलमा बिहीवार दिउँसो सवा २ बजेदेखि झण्डै डेढ घण्टा वार्ता भएको हो । 


Advertisement

ओलीसँगको वार्तापछि बाहिरिने क्रममा नेता नेपालले वार्तामा कुनै प्रगति नभएको बताए ।

‘कुराकानीमा कुनै प्रगति छैन,’ नेपालले भने । बुधवार पनि अध्यक्ष ओली र नेपालबीच सोही स्थानमा दुई घण्टा छलफल भएको थियो । 

बिहीवारको वार्ताअघि प्रधानमन्त्री ओली र नेता नेपालले होटलको झ्यालबाट धरहराको दृश्यावलोकन गरेका थिए ।

वार्ताको सहजीकरण गरेका प्रधानमन्त्रीका आर्थिक सल्लाहकार मोतिलाल दुगडले वार्ता सकारात्मक रहेको र शनिवार फेरि छलफल हुने संकेत गरे । 

नेता नेपाल जनकपुर जाने कार्यक्रम रहेकाले आजको वार्ता छिटो सकिएको हो । नेता नेपाल भोलि काठमाडौं फर्किन ढिला हुने भएकाले शनिवार मात्र छलफल हुने सम्भावना रहेको दुगडले बताए ।

नेपाल पक्षका २७ सांसदमाथि सोधिएको स्पष्टीकरणबारे निर्णय गर्न नेकपा एमाले केन्द्रीय समितिको बैठक शुक्रवार बस्दैछ । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्