चिनियाँ जनमुक्ति सेनाले पहिलोपटक तिब्बतीहरू मात्र राखिएको सैन्य इकाइ बनाउने प्रयास गरेको छ । 

भारतका सैन्य गुप्तचर अधिकारीहरूले आईएएनएस समाचार संस्थालाई बताएअनुसार, चिनियाँ सेनाका वरिष्ठ अधिकारीहरू तिब्बतका विशेष ठाउँमा गएर तिब्बतीहरू मात्र समावेश गरिने सुरक्षाबल बनाउन खोजिरहेका छन् ।

त्यसमा समावेश गरिएका अधिकांश तिब्बतीहरू मिश्रित हुन् अर्थात् अधिकांशका तिब्बती आमा र हान चिनियाँ पिता छन् । 

चिनियाँ सेनाका पूर्व हान चिनियाँ सैनिकहरूले तिब्बती महिलासँग विवाह गरेर जन्माएका सन्तान उक्त टुकडीमा रहने गुप्तचर अधिकारीहरूको कथन छ । 

ल्हासामा रहेका चिनियाँ सेनाका अधिकृतहरू सुदूरपश्चिममा रहेका न्गारी प्रिफेक्चर तथा सीमावर्ती जान्दा वा छाम्दा काउन्टीमा विशेष तिब्बती सैन्य इकाइमा भर्तीका लागि योग्य युवाहरूको खोजीमा लागेका छन् । 

गत फेब्रुअरी महिनादेखि भर्तीको काम शुरू गरिएको हो र अहिलेसम्म चलिरहेको छ । 
 

बेइजिङविरोधी तिब्बती कुनै हालतमा उक्त इकाइमा नपरोस् भनी चिनियाँ अधिकारीहरूले सुनिश्चित गरिरहेका छन् ।

चिनियाँ जनमुक्ति सेनाले ल्हासामा अनेकौं चरणमा भर्तीका कार्यक्रम चलाएर तिब्बतीहरूलाई समावेश गर्न खोजेका छन् । 

भारतले बनाएको गोप्य तिब्बती सुरक्षाबल स्पेसल फ्रन्टियर फोर्स (एसएफएफ) जस्तै गरी चारवटा बटालियन बनाउन खोजिएको छ । तिनलाई विशेष कारवाहीका लागि उपयोग गरिनेछ । 
 

एसएफएफ सन् १९६० को दशकमा मेजर जनरल सुजन सिंह उबानले गठन गरेका थिए । उनी अनियमित युद्धका विशेषज्ञ थिए । चीनसँगको द्वन्द्वको स्थितिमा तिब्बतमा विशेष कारवाही गर्नका लागि एसएफएफ बनाइएको थियो । 

पोहोर साल लद्दाखमा आमनेसामनेको स्थिति हुँदा एसएफएफका कमान्डोहरूले पांगोङ त्सो क्षेत्रमा कसैले नियन्त्रण गरेका स्थानमा टेक यान्ड होल्ड अपरेसन गरेका थिए । त्यसपछि चिनियाँहरू सैन्य फिर्तीका लागि राजी भएका थिए । 
 

तिब्बतीहरू रहेको एसएफएफले यसरी सजिलै हिमालयका उचाइमा पनि चढेको देखेपछि उनीहरू हान चिनियाँ सैनिकभन्दा राम्रो काम गर्न सक्ने विश्वास पीएलएका कमान्डरहरूले गरेका थिए । 

चिनियाँ जनमुक्ति सेनामा २० लाखभन्दा बढी सैनिक छन् तर तिनमा तीनदेखि चार हजार तिब्बती मात्र छन् । 

‘त्यसैले यो भर्ती महत्त्वपूर्ण छ,’ भारतको पूर्वी पृतना सैनिकका पूर्व प्रमुख लेफ्टिनेन्ट जनरल जेआर मुखर्जीले बताए । 

उनले आईएएनएसलाई बताएअनुसार, चिनियाँहरू तिब्बती र नेपाली गोर्खाहरूलाई भर्ती गराउन खोजिरहेका छन् । 

‘उनीहरूले गोर्खालीलाई भर्ती गराउन सकेका छैनन् किनकि गोर्खालीहरू भारतीय सेनासँग ऐतिहासिक र भावनात्मक रूपमा बाँधिएका छन् । त्यसैले उनीहरू तिब्बतीको खोजमा छन् किनकि एक औसत चिनियाँ सैनिकले उच्च हिमाली क्षेत्रमा हाम्रा जवानहरूसँग शारीरिक रूपमा प्रतिस्पर्धा गर्न सक्दैन,’ उनले भने ।