नेपालमा कोरोना भाइरस सङ्क्रमणको दोस्रो लहरको फैलावट र क्षति बढ्दै गएको छ । गएको २४ घण्टामा थप सात हजार ६६० जनामा कोरोना सङ्क्रमणसँगै ५५ जनाको मृत्यु भएको छ । स्वास्थ्य तथा जनसङ्ख्या मन्त्रालयका अनुसार यो २४ घण्टामा सङ्क्रमण र मृत्यु हालसम्मकै उच्च हो। मन्त्रालयका प्रवक्ता डा. जागेश्वर गौतमले फैलावट र क्षति उच्च भएको भन्दै मङ्गलबार देशभरबाट ५५ जना सङ्क्रमितको मृत्यु भएको जानकारी दिए ।

 योसहित नेपालमा कोरोना सङ्क्रमणबाट मृत्यु हुनेको सङ्ख्या तीन हजार ४१७ पुगेको छ । यसैगरी गएको २४ घण्टामा थप सात हजार ६६० जनालाई कोरोना भाइरस सङ्क्रमण पुष्टि भएको छ । प्रवक्ता गौतमका अनुसार एक हजार ७७५ जना सङ्क्रमित निको भएका छन् । कुल १६ हजार १३१ जनाको पीसीआर परीक्षण गर्दा सात हजार ५८७ जना सङ्क्रमित भएका छन् भने ५७१ जनाको एन्टिजेन परीक्षण गर्दा ७३ जना थपिएका छन् ।

यस्तै देशभर एक हजार ७७५ जना निको भएका छन् । हालसम्म दुई लाख ८७ हजार ७९० जना सङ्क्रमित निको भइसकेका छन् । यस्तै सङ्क्रमितको सङ्ख्या तीन लाख ५१ हजार पाँच पुगेको छ । गोरखापत्रमा खबर छ ।