बेलायतमा जी७ को सम्मेलनमा भाग लिन गएको भारतीय प्रतिनिधिमण्डललाई त्यहाँको सार्वजनिक स्वास्थ्य सेवाले सेल्फ आइसोलेसनमा जान भनेको छ । 

भारतका विदेशमन्त्री सुब्रमण्यम जयशंकरले प्रतिनिधिमण्डलका केही सदस्यलाई कोभिड लागेको हुन सक्ने बताए । 

उनले बेलायतकी गृहमन्त्री प्रीति पटेलसँग मंगलवार प्रत्यक्ष भेटघाट गरेका थिए तर अब सबै बैठक भर्चुअल गर्ने भएका छन् । 

भारत जी७को सदस्य हैन तर त्यहाँका प्रतिनिधिमण्डललाई अतिथिका रूपमा बोलाइएको थियो । 

जी७ संसारका प्रमुख आर्थिक शक्तिहरू बेलायत, क्यानडा, फ्रान्स, जर्मनी, इटली, जापान र अमेरिका सम्मिलित समूह हो । 

जी७ का राष्ट्रप्रमुखहरूको आधिकारिक शिखर सम्मेलन जुन महिनामा कोर्नवालमा हुँदैछ तर अहिले मन्त्रीहरू वार्ताका लागि बेलायत पुगेका छन् । 

भारत, अस्ट्रेलिया, दक्षिण कोरिया र दक्षिण अफ्रिकालाई अतिथिका रूपमा निमन्त्रण गरिएको हो किनकि बेलायतले हिन्द प्रशान्त क्षेत्रसँगको सम्बन्ध गहिरो बनाउन खोजेको छ ।