मुख्यमन्त्री पृथ्वी सुब्बा गुरुङविरुद्ध पेश भएको अविश्वासको प्रस्तावमाथि छलफल गर्न गण्डकी प्रदेश सभाको बैठक वैशाख २७ गते बस्ने भएको छ ।

जनमोर्चाले आफ्ना सांसद सम्पर्कविहीन रहेको भन्दै बैठक रोक्न निवेदन दिएपछि वैशाख १४ गते बसेको बैठक अनिश्चितकालका लागि स्थगित भएको थियो ।

जनमोर्चाको आग्रहमा सभामुखले बैठक स्थगित गरेपछि मुख्यमन्त्रीविरुद्ध अविश्वासको प्रस्तावमाथि मतदान गर्ने कार्यक्रम प्रभावित भएको थियो ।

बैठक स्थगित भएलगत्तै जनमोर्चाका सांसद खिमविक्रम शाही अस्पतालमा फेला परेका थिए । 

बिहीवार बसेको कार्यव्यवस्था परामर्श समितिको बैठकले वैशाख २७ गते ११ बजेका लागि बैठक राख्ने सहमति गरेको जानकारी दिए ।

अविश्वास प्रस्तावमा छलफल गर्न कांग्रेस, माओवादी र जसपाले समावेदन गरेपछि वैशाख १३ गते अधिवेशन शुरु भएको थियो । 

कांग्रेस संसदीय दलका नेता कृष्णचन्द्र नेपाली पोखरेललाई मुख्यमन्त्री प्रस्ताव गर्दै कांग्रेस र माओवादी केन्द्रले एमालेका मुख्यमन्त्री गुरुङविरुद्ध अविश्वासको प्रस्ताव दर्ता गराएका थिए । 

यसबीचमा गण्डकी प्रदेशमा प्रदेश प्रमुख परिवर्तन भएका छन् । माओवादीको सिफारिशमा प्रदेश प्रमुख बनेका अमिक शेरचनलाई हटाएर सीता पौडेललाई नयाँ प्रदेश प्रमुख नियुक्त गरिएको छ ।