बागमती प्रदेशबाट राष्ट्रिय सभामा रिक्त सदस्य पदको उपनिर्वाचनका लागि ३ जनाको उम्मेदवारी परेको छ ।

नेमकिपाबाट कृष्णबहादुर तामाङ, एमालेबाट रामबहादुर थापा मगर र स्वतन्त्रबाट खिमलाल देवकोटाले शुक्रवार मनोनयनपत्र दर्ता गराएका हुन् । 

३ उम्मेदवारमध्ये गृहमन्त्री थापा र देवकोटाबीच मुख्य प्रतिस्पर्धा हुने देखिएको छ । एमालेकै माधवकुमार नेपाल पक्षको समर्थन पाएका देवकोटालाई कांग्रेस, माओवादी केन्द्र र जनता समाजवादी पार्टी (जसपा) नेपालको साथ छ । नेपाल पक्षले साथ नदिए थापा राष्ट्रिय सभामा पुनर्निर्वाचित हुन गाह्रो हुनेछ । 

गृहमन्त्री थापाले हेटौैंडा–५ स्थित बागमती प्रदेश निर्वाचन आयोगको कार्यालयमा शुक्रवार मध्याह्न १२ः३० बजे उम्मेदवारी दर्ता गराए । थापाका प्रस्तावक बागमतीका मुख्यमन्त्री डोरमणि पौडेल र समर्थक सामाजिक विकासमन्त्री सरस्वती बस्नेत छन् । 

एमाले नेता/कार्यकर्ता तथा प्रदेश मन्त्रिमण्डलको टोलीसहित उम्मेदवारी दर्ता गराउन निर्वाचन कार्यालय पुगेका थापाले आफ्नो जित निश्चित रहेको दाबी गरे । ‘नेकपा एमालेको सबै मत मलाई आउनेमा म विश्वस्त छु, निर्वाचन जित्छु,’ उनले भने । उनी हेलिकप्टर चढेर हेटौंडा आएका थिए ।  

देवकोटाले शुक्रवार बिहान ११ः१५ मा उम्मेवारी दिए । देवकोटाका प्रस्तावकमा माओवादी केन्द्र बागमती प्रदेश संसदीय दलका नेता शालिकराम जम्कट्टेल र समर्थकमा कांग्रेस बागमती प्रदेश संसदीय दलका प्रमुख सचेतक राधा घले छन् । देवकोटाले आफू सहजै जित्ने दाबी गरे ।

उनले भने, ‘स्थानीय तह र प्रदेशमा बसेर काम गरेको अनुभवले अब राष्ट्रिय सभामा बसेर काम गर्छु ।’

थापाले चुनाव चिह्न सूर्य र देवकोटाले कमल माग गरेका छन् । नेमकिपाबाट तामाङले मध्याह्न १२ः१५ बजे उम्मेदवारी दर्ता गराए । 

राष्ट्रियसभा सदस्य निर्वाचनका लागि प्रदेशसभा सदस्य १ जनाको मत बराबर ४८ मत र स्थानीय तहका प्रमुख र उपप्रमुखको १ मत बराबर १८ मत गणना हुने बागमती प्रदेश निर्वाचन आयोगको कार्यालयले जनाएको छ । प्रदेशभित्र ११० प्रदेशसभा सदस्यको ५ हजार २८० र ११९ स्थानीय तहका २३८ अध्यक्ष र उपाध्यक्षका ४ हजार २८४ मत रहेको निर्वाचन कार्यालयले जनाएको छ । 

जम्मा ९ हजार ५६४ मत रहेको छ । तीमध्ये प्रधानमन्त्री केपी शर्मा ओली पक्षका ३४ प्रदेशसभा सदस्यको १ हजार ६३२ मत छ । नेपाल पक्षका २३ प्रदेशसभा सदस्यको १ हजार १०४ मत छ । माओवादी केन्द्रको २३ प्रदेशसभा सदस्यको १ हजार १०४, कांग्रेसका २२ प्रदेशसभा सदस्यको १ हजार ५६ मत छ । नेमकिपाका २ सहित अन्य ८ प्रदेशसभा सदस्य छन् । 

स्थानीय तहतर्फ एमालेका १३३ अध्यक्ष/उपाध्यक्ष रहेको ओली पक्षको दाबी छ । उनीहरू सबैले एमालेमै मतदान गरे २ हजार ३९४ मत थापालाई थप हुनेछ । स्थानीय तहका अध्यक्ष र उपाध्यक्षमध्ये ४० प्रतिशत आफ्नो पक्षका रहेको नेपाल खेमाको दाबी छ । नेपाल पक्षले घोषणा नगरे पनि आफैंले खडा गरेको देवकोटालाई मत हाल्ने तयारी छ ।

‘हाम्रो सल्लाह भइरहेको छ, सामूहिक निर्णय हुन्छ । नेताहरूसँगको सल्लाहमा छौं,’ बागमती प्रदेशसभा सदस्य मुनु सिग्देलले भनिन् । अन्नपूर्ण पोस्ट दैनिकमा खबर छ ।