सुदूरपश्चिम प्रदेशको सामाजिक विकास मन्त्रालयले पहाडी जिल्लाका अस्पतालमा प्रयोग नभएको भन्दै भेन्टिलेटर फिर्ता मागेको समाचारप्रति मौलिक जरोकिलो पार्टी सुदूरपश्चिम प्रदेशको गम्भीर ध्यानाकर्षण भएको छ ।

कोरोना संक्रमणको महाव्याधि अघि पर्याप्त तयारी गर्नुपर्ने बेलामा कुर्सीको लुछाचुँडीमा समय खेर फाल्ने र समय घर्किसकेपछि प्रयोगमा नआएको भन्दै भेन्टिलेटर जस्तो संवेदनशील स्वास्थ्य सामग्री फिर्ता माग्नु दुर्गम क्षेत्रका जनतामाथि अन्याय गरेको पार्टीको ठहर छ । 

‘कोरोना संक्रमण समुदायमा फैलिँदै गएको हुँदा अत्यावश्यक जनशक्ति र स्वास्थ्य सामग्री तयारी अवस्थामा राख्नुपर्नेमा उल्टै भेन्टिलेटर फिर्ता लैजानु मूर्खतापूर्ण कार्य हुनजान्छ,’ पार्टीका सुदूरपश्चिम प्रदेश अध्यक्ष खिमानन्द जोशीले भने ।

पहाडका जिल्ला अस्पतालहरूबाट भेन्टिलेटर फिर्ता लैजाने निर्णय तत्काल सच्याउँदै आवश्यक जनशक्तिको व्यवस्था गर्न मौलिक जरोकिलो पार्टी सुदूरपश्चिमले प्रदेश सरकारसँग जोडदार माग गरेको छ ।