दक्षिणपश्चिम चीनमा रहेको एक काउन्टीले बर्थडे पार्टी तथा अन्य उत्सवहरूमा प्रतिबन्ध लगाएको छ । 

केन्द्र सरकारले मितव्ययी बन्न निर्देशन दिएपछि काउन्टीले यस्तो निर्णय लिएको हो । 

उसले विवाह र अन्त्येष्टिका लागि पनि नयाँ नियम ल्याएको छ । कुनै पनि समारोहमा २०० युआनभन्दा बढी रकम उपहारका रूपमा दिन नपाइने भएको छ । 
 

फुनिङ काउन्टीको यो नियम कम्युनिस्ट पार्टीका सदस्य, सरकारी कर्मचारी र गाउँ संगठनका नेताहरूमा लागू गरिएको छ । 

पार्टीमा नगद उपहार दिने परम्परागत चिनियाँ प्रचलन हो । 

तर प्रभावशाली व्यक्तिहरूलाई घूस दिनका लागि उपहारको उपयोग गरिने गरेको छ । 

यसअघि सन् २०१५ मा कम्युनिस्ट पार्टीले आफ्ना सदस्यहरूलाई अत्यधिक खानपिन गर्न, गल्फ क्लबको सदस्य बन्न वा निजी क्लबमा प्रवेश गर्न प्रतिबन्ध लगाएको थियो । भ्रष्टाचारनिरोधका लागि उसले यो कदम चालेको थियो । 

चीनले वर्षौंदेखि जनतालाई विवाह समारोहमा तडकभडक नगर्न तथा सामान खेर नफाल्नका लागि आग्रह गरिरहेको छ । 

नयाँ नियमअनुसार विवाहमा भोजका टेबलहरूमा २० जनाभन्दा बढी राख्नुहुँदैन । अनि २०० भन्दा बढी पाहुना बोलाउनुहुँदैन ।
 

रेस्टुराँमा भोज गर्ने हो भने एउटा पाहुनालाई खुवाउन ५० युआनभन्दा बढी खर्च गर्नुहुँदैन । अनि घरमा समारोह गर्दा एउटा टेबलका लागि ३०० युआनभन्दा बढी खर्च गर्नुहुँदैन । 

विवाहमा जन्ती आउनेहरू कारको संख्या पनि १० भन्दा कम हुनुपर्छ ।