आफ्नो बहुमत नपुग्ने भएपछि प्रमुख प्रतिपक्षी दल नेपाली कांग्रेस सरकारको नेतृत्वको दौडबाट पछि हटेको छ । संविधानको धारा ७६ को उपधारा २ अनुसार बहुमतको सरकार बनाउन राष्ट्रपति विद्यादेवी भण्डारीले आह्वान गरेको समय सकिनु केही घण्टाअघि बिहीबार बसेको काँग्रेस पदाधिकारी बैठकले आफ्नो पक्षमा बहुमत जुटाउन नसकिने निष्कर्ष निकालिएको हो । 

जनता समाजवादी पार्टीका अध्यक्ष महन्थ ठाकुर पक्ष प्रधानमन्त्री केपी शर्मा ओलीको पक्षमा नै उभिने भएपछि कांग्रेसले सरकार गठनका लागि बहुमत पुराउन नसकेको हो । 

बुढानिलकण्ठस्थित सभापति शेरबहादुर देउवाको निवासमा बसेको बैठकले बहुमत नपुग्ने भएपछि सरकारको नेतृत्वको दाबी गर्ने अवस्था नबनेको सहमहामन्त्री डाक्टर प्रकाशशरण महतले जानकारी दिए । साथै उनले एकपटक प्रतिनिधिसभामा विश्वासको मत गुमाईसकेका प्रधानमन्त्री ओलीले धारा ७६ को उपधारा २ बमोजिम जसपासँग मिलेर सरकारको नेतृत्वको दाबी गर्न नमिल्ने तर्क पनि गरे । 

उनले भने “संभावना देखिएन । संविधानको धारा ७६ को उपधारा २ अनुसार जुन आजसम्म दाबी गर्ने समय थियो । यसभित्र अरु सहयोगी दलहरूको पनि निर्णयको आवश्यकता पथ्र्यो । जसपामा पनि एकमतको निर्णय गर्ने अवस्था देखिएन र माधवजीहरुले पनि निर्णय गर्न सक्नुभएन । त्यसो हुनाले दाबी गर्ने अवस्था अब रहेन । परिणाम नआउने दाबी गर्न जाने कुरा भएन । एक ÷दुई घण्टामा अचानक समर्थन जुट्ने अवस्था आयो भने बेग्लै कुरा हो । तर अहिलेसम्म त्यो स्थिति देखिएन । ७६÷२ (संविधानको धारा ७६ को उपधारा २ ) अन्र्तगत त उहाँ(प्रधानमन्त्री केपी शर्मा ओली)ले दाबी गर्न सक्नुहुन्न । त्यो त गलत नजिर बस्छ । उहाँले एकपटक संसदमा विश्वासको मत लिन असफल भइसकेपछि फेरी ७६/२(संविधानको धारा ७६ को उपधारा २ ) अन्र्तगत दाबी गर्नु अनुपयुक्त हुन्छ । त्यो अनुसार गर्नु हुदैन भन्ने हाम्रो निष्कर्ष हो ।”

वैकल्पिक सरकार बन्न नसक्ने भएपछि अब केपी ओली नै प्रधानमन्त्री बन्ने पक्कापक्की भएको छ । उनी जसपाको सहयोगमा बहुमतको प्रधानमन्त्री बन्छन् कि ७६ को उपधारा ३ अनुसार बन्छन् भन्नेमा निश्चित भइसकेको छैन । 

यसैबीच नेकपा माओवादी केन्द्र पनि बहुमत जुट्न नसक्ने निष्कर्षमा पुगिसकेको छ ।

पार्टी कार्यालय पेरिसडाँडामा बसेको बैठकमा एमालेकै नेपाल समूहले सहयोग नगर्ने भएपछि आवश्यक बहुमत पुर्‍याउन नसकिने निष्कर्ष निकालिएको हो ।

नेपाली कांग्रेस, माओवादी केन्द्र र जसपाको उपेन्द्र यादव समूहले सरकार बनाउन कोसिस गरेपनि बहुमत नपुगेको हो ।