नेपाल टेलिकमले आफ्ना सेवाहरुमा थप आधुनिकीकरण गर्ने भएको छ । जसअनुसार टेलिकमले वायरलेस प्रविधिको चौथो पुस्ताको फोरजीमा एलटीई प्रविधि अन्तर्गत भीओएलटीई सेवा सञ्चालनमा ल्याउन लागेका बताएको छ । 
विश्व दूरसञ्चार तथा सूचना समाज दिवस (मे १७) को अवसरमा टेलिकमले सोमबारदेखि प्रिपेड तथा पोस्टपेड फोरजी मोबाइलमा सो सेवाको परीक्षण शुरुवात गर्न लागिएको आइतबार एक विज्ञप्तिमार्फत जानकारी दिएको छ ।

 यो सेवाको उपलब्धतासँगै फोरजी मोबाइलमा हाई डेफिनेसन भ्वाइस, डायल गर्नासाथ सम्पर्क कायम हुने नेटवर्कको सहज उपलब्धताका साथै सेवामा थप गुणस्तरीयता महशुस गर्न सकिने टेलिकम प्रवक्ता राजेश जोशीले जारी गरेको विज्ञप्तिमा उल्लेख छ । 

यो सेवाका लागि नेपाल टेलिकमका सेवाग्राहीले भीओएलटीई  सपोर्ट गर्ने मोबाइलबाट *444# डायल गरी प्राप्त निर्देशनहरुको अनुशरण गरी सिममा सुविधा एक्टिभेट गर्नुपर्दछ । यो सेवा मोबाइलमा सक्रिय गर्नका लागि मोबाइलको सेटिङमा गई भीओएलटीई कल फर एनटिसी सिम समेत इनेबल गर्नुपर्दछ र लगत्तै मोबाइल सेटको माथिल्लो लहरमासोसम्बन्धी  संकेत देखापर्दछ ।संकेत देखापरेपछि *111# डायल गर्नुपर्दछ । नेपाल टेलिकमले यो सेवाको प्रयोगकर्तालाई नेपाल टेलिकमको नेटवर्कमा २८ दिनसम्म प्रयोग गर्न सकिने १०० मिनेट भीओएलटीई भ्वाइस सुविधा एक पटकका लागि निःशुल्क उपलब्ध गराउने जनाइएको छ ।