२ नम्बर प्रदेशका मुख्यमन्त्री लालबाबु राउतले कोरोना महामारी नियन्त्रणका लागि आवश्यक सहयोग गरिदिन प्रदेशस्थित राष्ट्रसंघीय निकाय (यूएन एजेन्सी) लाई अपिल गरेका छन् ।

प्रदेश नीति तथा योजना आयोगको संयोजनमा जनकपुरधामस्थित मुख्यमन्त्री निवास मधेश भवनमा सम्पन्न यूएन एजेन्सीसँगको छलफलमा राउतले महामारी नियन्त्रणका लागि अतिआवश्यक देखिएको भेन्टिलेटर, अक्सिजन ग्यासको आपूर्ति, औषधि, जनशक्ति र भ्याक्सिन उपलब्ध गराइदिन अपिल गरे ।

यूएन एजेन्सिजले मुलुकलाई गर्दै आएको सहयोग प्रदेशमा खासै नपुगेको गुनासो गर्दै मुख्यमन्त्री राउतले यूएन एजेन्सीहरूबाट आउने सहयोग प्रदेशसम्म ल्याउनका लागि पहल गर्न समेत प्रदेशस्थित प्रतिनिधिलाई आग्रह गरे ।

यूएन एजेन्सिजले हालसम्म महामारी नियन्त्रणमा गर्दै आएको सहयोगका लागि धन्यवाद दिँदै मुख्यमन्त्री राउतले आगामी दिनमा समेत सहयोगको अपेक्षा समेत व्यक्त गरेका छन् ।

छलफलमा सामाजिक विकासमन्त्री नवलकिशोर साह, मुख्यन्यायाधिवक्ता दीपेन्द्र झा, नीति तथा योजना आयोगका उपाध्यक्ष डा. भोगेन्द्र झा, यूएनडीपीका धनबहादुर चन्द, यूएनडीएसएसका जितेन्द्रजंग कार्की, डब्ल्यूएचओका डा. सुरेशकुमार शुक्ला, आईओएमका पंकजलाल सिंह, युनिसेफका अशोककुमार झा र यूएनएफपीएका नरेन्द्र मिश्रको सहभागिता रहेको थियो ।