डोटीका जिल्लाका कोरोना संक्रमित बिरामीलाई उपचारमा सहज होस् भन्ने उद्देश्यले दिपायल राजपुरमा रहेको सेती सभागृहलाई अस्थायी कोरोना अस्पताल बनाइने भएको छ ।

दिपायलसिलगढी नगरपालिकाको पहलमा डोटीका ९ वटै स्थानीय तहका प्रमुख, प्रमुख जिल्ला अधिकारी, सुरक्षा निकायका प्रमुख, स्वास्थ कार्यालय प्रमुख, जिल्ला अस्पतालका प्रतिनिधि, नागरिक समाज तथा पत्रकारसहित सर्वपक्षीय सहभागी बैठकले सभाहललाई ५० शय्याको अस्थायी कोरोना अस्पताल बनाउने निर्णय गरेको प्रमुख जिल्ला अधिकारी सुनिल खनालले बताए ।

बैठकले सभाहललाई अस्थायी कोरोना अस्पताल बनाइ जिल्ला कोभिड संकट व्यवस्थापन केन्द्र (डीसीसीएमसी)लाई व्यवस्थापकीय जिम्मेवारी दिने निर्णय समेत गरेको छ ।

अस्थायी अस्पतालको प्रभावकारी सञ्चालनका लागि आवश्यक जनशक्ति, अन्य स्रोतसाधन लगायतका विस्तृत विवरण सहितको प्रतिवेदनका लागि जिल्ला स्वास्थ्य कार्यालयका निमित्त प्रमुख उद्धवबहादुर ठगुन्नाको संयोजकत्वमा ५ सदस्यीय एक अध्ययन प्रतिवेदन टोली समेत बनाइएको छ । 

टोलीले जेठ ४ गतेसम्म डीसीसीएमसीलाई प्रतिवेदन पेश गर्नुपर्ने निर्णय गरेको जिल्ला अस्पतालका अध्यक्ष यज्ञराज जोशीले जानकारी दिए । अस्पतालका लागि ३० शय्या जिल्ला अस्पताल र २० शय्या दिपायल राजपुरमा रहेको सुजङ अस्पतालले उपलब्ध गराउने भएका छन् ।

डाक्टरसहित अन्य स्वास्थ्यकर्मी, अक्सिजन सिलिन्डर, औषधी, फर्निचर लगायत सबै व्यवस्थापन जिल्लाका सबै स्थानीय तहले गर्ने निर्णय गरिएको दिपायल सिलगढीका निमित्त कार्यकारी प्रमुख खेमराज गुरुङले जानकारी दिए ।