चीनका एक शीर्ष गुप्तचर अधिकारी आफ्नी छोरीका साथ अमेरिकातर्फ भागेको पश्चिमी सञ्चारमाध्यमहरूले खबर दिएका छन् । 

उनले कोभिड र वुहान प्रयोगशालाको रहस्योद्घाटन गरिसकेको बताइएको छ । 

दोङ जिङ्वे नामक गरेका ती गुप्तचर अधिकारी पहिला हङकङ अनि त्यसपछि अमेरिकातर्फ उडेको र छोरी दोङ याङलाई पनि सँगै लगेको बताइएको छ ।

उनले वुहानको प्रयोगशालाबाट भाइरस चुहिएको भन्ने विषयमा प्रमाण पेश गरेपछि अमेरिकाका राष्ट्रपति जो बाइडनले त्यस विषयमा थप अनुसन्धान गर्न अमेरिकाका गुप्तचर निकायलाई निर्देशन दिएको बताइएको छ । 

प्रयोगशालाबाट भाइरस चुहिएको कुरालाई षड्यन्त्र सिद्धान्त भनी धेरैले उडाएका थिए । डोनल्ड ट्रम्प प्रशासनले आफ्नो अक्षमता लुकाउनका लागि यसलाई अगाडि सारेको भनिएको थियो । 

तर दोङ गत फेब्रुअरी १० मा छोरीसँग अमेरिकातर्फ भागेको र प्रमाण पेश गरेको स्पाई टक नामक पत्रिकाले खबर दिएको छ । 

उनी चीनको गुप्तचर निकाय मिनिस्ट्री अफ स्टेट सेक्युरिटीको प्रतिगुप्तचरी इकाइका प्रमुख थिए । 

उनी भागेको खबर साँचो हो भने चीनबाट भाग्नेमध्ये उनी सबभन्दा ठूला अधिकारी हुन् । 

उनको पलायनलाई चीनले अलास्कामा अमेरिकासँग गरेको शीर्ष तहको वार्ताका क्रममा उठाइएको बताइएको छ । 

उनी भागेको कुरा चीनबाट पुष्टि गराउन लगभग असम्भव छ ।