कश्मीरको राजनीतिक दलका नेताहरू बिहीवार प्रधानमन्त्री नरेन्द्र मोदीसँगको बैठकमा भाग लिन तयार भएका छन् । 

मंगलवार भएको गुपकार गठबन्धनको बैठकपछि नेसनल कन्फरेन्सका प्रमुख फारुक अब्दुल्लाले प्रधानमन्त्रीबाट निम्तो पाएका सबैजना बैठकमा बस्ने बताए । 
 

गुपकार गठबन्धनका प्रवक्ता युसुफ तारीगामीले भने, ‘हामी जम्मु–कश्मीरका विषयमा उहाँसँग कुराकानी गर्नेछौं । बैठकको कुनै एजेन्डा छैन, जसले जे बोल्न मन बोले हुन्छ । हामी आकाशको तारा माग्ने छैनौं । हामीसँग जे थियो, त्यो दिनुस् भनी माग्नेछौं ।’

मोदीसँगको बैठकमा जम्मु कश्मीरलाई पुनः पूर्ण राज्यको दर्जा दिने विषयमा कुराकानी हुन सक्छ । बैठकमा विधानसभा निर्वाचन गराउने विषयमा पनि चर्चा हुने आशा छ । 

जम्मु कश्मीरमा सन् २०१८ मा चुनाव हुनुपर्ने थियो । त्यतिखेर महबूबा मुफ्तीको पार्टी पीडीपी र भाजपाको गठबन्धन टुटेको थियो ।