भारतको पश्चिम बंगालमा भारतीय जनता पार्टीका नेता दिलीप घोषले मुख्यमन्त्री ममता बनर्जीको आलोचना गर्ने क्रममा गोर्खाल्यान्ड आन्दोलनप्रति विषवमन गरेका छन् । 
 

जंगलमहल क्षेत्रलाई बेग्लै राज्य बनाउनुपर्ने भनी भाजपाका नेता जोन बार्ला र सौमित्र खानले बयान दिएपछि बंग भंग गर्ने नीति भाजपाको नरहेको घोषले बताए । 

उल्टो ममता बनर्जी गोर्खाल्यान्ड आन्दोलनको एक हिस्सेदार रहेको भन्दै उनले आलोचना गरे । 

गोर्खा जनमुक्ति मोर्चाका नेता विमल गुरुङलाई ममताले आश्रय दिएको आरोप घोषले लगाए । 

‘बंगाललाई कसले विभाजन गर्न खोजेको छ ? ममता बनर्जी दार्जीलिङमा भएको आन्दोलनप्रति सहानुभूति राख्थिन् । उनले गोर्खाल्यान्डको माग राखेर आन्दोलन गर्ने जीटीएसँग सम्झौतामा हस्ताक्षर गरेकी थिइन् । भाजपाले त्यसो कहिल्यै गरेन । उनीहरूका नेता विमल गुरुङ हामीकहाँ आउँदा हामीलाई पृथक्तावादी भनेका थिए तर अहिले उनी तिनीहरूसँगै छन् त । बंगालका जनताले उनीहरूका वास्तविकता बुझेका छन् त्यसैले उत्तर बंगालका जनताले उनीहरूलाई उत्तर दिएका छन् ।’

ममता बनर्जीको तृणमूल कांग्रेसले बंगाललाई एकजुट राख्नेलाई मात्र आफ्नो समर्थन रहने स्पष्ट पारेको छ ।