युरो कपको ग्रुप डीमा इंग्ल्यान्डले समूहमा पहिलो स्थान हासिल गरेपछि जर्मनी, फ्रान्स, पोर्चुगल वा हंगेरीमध्ये एउटा टीमको सामना गर्नुपर्ने भएको छ । 

ग्रुप चरणको खेलमा निकै सामान्य प्रदर्शन गरेको इंग्ल्यान्डको सामना घाघडान टोलीहरूसँग हुन लागेको हो । 

ग्रुप एफमा जर्मनी अहिले दोस्रो स्थानमा छ र उसको अन्तिम ग्रुप चरणको खेल आज राति हंगेरीविरुद्ध छ । 
 

विश्वविजेता फ्रान्स वा युरो कपको साबिक विजेता पोर्चुगलमध्ये कुनै एकसँग पनि इंग्ल्यान्डको भिडन्त हुन सक्छ । 

फ्रान्स अहिले चार अंकका साथ ग्रुप एफको पहिलो स्थानमा छ भने जर्मनी गोलअन्तरका आधारमा पोर्चुगलभन्दा अगाडिको स्थानमा छ । हंगेरी चाहिँ अंकतालिकाको पुछारमा छ । 

भरे राति फ्रान्सको भिडन्त पोर्चुगलसँग र जर्मनीको भिडन्त हंगेरीसँग छ । 

कथंकदाचित् इंग्ल्यान्डले जर्मनीसँग राउन्ड अफ १६ मा भिड्नुपरेछ भने वेम्ब्लीको उक्त म्याच निकै रोचक हुनेछ किनकि यी दुई टोलीबीचको प्रतिस्पर्धा निकै पुरानो हो । 
 

इंग्ल्यान्ड र जर्मनीबीचको पछिल्लो भिडन्त सन् २०१० को विश्वकपमा भएको थियो । त्यतिखेर जर्मनहरूले इंग्लयान्डलाई ४–१ ले हराएका थिए ।