खाद्यान्न बिक्री वितरणमा सरकारी छुट बन्द

सरकारी स्वामित्वमा सञ्चालित २ संस्थाले सरकारले निषेधाज्ञाका लागि दिएको छुट बन्द गरेका छन् ।

मंगलवारदेखि खाद्य व्यवस्था तथा व्यापार कम्पनी र बुधवारदेखि साल्ट ट्रेडिङले खाद्यान्नमा उपभोक्तालाई दिँदै आएको २० प्रतिशत छुट बन्द गरेका हुन् ।


Advertisement

काठमाडौं उपत्यकाका ३ जिल्लासहित देशका अधिकांश जिल्लामा जारी निषेधाज्ञामा केही खुकुलो भएसँगै २० प्रतिशत छुट रोकिएको खाद्य कम्पनीले जनाएको छ ।

कम्पनीका सूचना अधिकारी शर्मिला न्यौपानेले गत वैशाख २० गतेदेखि देशभर रहेका ४८ वटा बिक्री काउन्टरबाट दिइएको छुट मंगलवारदेखि रोकिएको जानकारी दिए ।

उनका अनुसार कम्पनीले करीब डेढ महिनाको अवधिमा १ करोड ३८ लाख रुपैयाँभन्दा बढीको छुुट दिइएको छ । करीब ६ करोडभन्दा बढीको कारोबार हुँदा रकम छुट दिइएको छ । छुट अवधिमा १२ हजार ८८ क्विन्टल चामल बिक्री गरिएको छ ।

साल्ट ट्रेडिङ कर्पोरेसनले समेत बुधवारदेखि छुट रोकिएको जनाएको छ । २ कम्पनीले छुट दिँदा उपभोक्ताको भीड बढेको भन्दै गत वैशाख २५ गतेदेखि बिहान ७ देखि ९ बजेसम्म मात्र खाद्यान्नमा छुट दिएका थिए ।

अर्थमन्त्री विष्णुप्रसाद पौडेलले गत जेठ १५ गते आर्थिक वर्ष २०७८/७९ को बजेट सार्वजनिक गर्दै निषेधाज्ञा अवधिभर खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पाेरेसनबाट खाद्य पदार्थ खरीद गर्दा २० प्रतिशतसम्म छुट पाइने बताएका थिए ।

साल्ट ट्रेनिङ कर्पाेरेसनले आफ्नो उत्पादनबाट ५ जनाको परिवारलाई १ महिनाका लागि पुग्ने खाद्य पदार्थ सरकारले तोकेको २० प्रतिशत छुट दिएको थियो । कम्पनीले २ किलो पीठो, चिनी, नून, १ लिटर तेल र १ सिलिन्डर ग्यासमा छुट दिनेछ ।

छुटपछि अब पीठो ४४, चिनी ६३, नुन १६, तेल प्रतिलिटर १८८ र ग्यास प्रतिसिलिन्डर १ हजार १२० रुपैयाँमा बिक्री गरेको थियो । खाद्य व्यवस्था तथा व्यापार कम्पनी लिमिटेडले २ किलो कर्णालीको सिमी र ३० किलो चामल (कम्पनीसँग रहेको बासमती र मार्सी बाहेकको चामल) मा २० प्रतिशत छुट दिएको थियो ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्