रसुवागढी नाकामा सामान ढुवानीका लागि अनुमति नपाएका सवारीसाधनको कारवाहीबाट २ महिनामा ९ लाख ३९ हजार ५०० राजस्व संकलन भएको छ । 

गत वैशाख र जेठ महिनामा सामान ढुवानीका लागि अनुमति नपाएका कन्टेनर, ट्रक, टिप्पर, जीप तथा कार गरी ८६८ सवारीसाधनको कारवाहीबाट सो रकम संकलन भएको जिल्ला ट्राफिक प्रहरी कार्यालय रसुवाले जनाएको छ । 

कोभिड–१९ रोकथाम तथा नियन्त्रणका लागि सरकारले जारी गरेको निषेधाज्ञाका समयमा अनुमति नपाएका सवारीसाधनको कारवाहीस्वरूप उठाएको राजस्व रसुवाकै इतिहासमै ठूलो भएको प्रहरीको दाबी छ ।

स्वास्थ्य सरक्षा मापदण्ड पालना पूरा गरेका र सडक अनुमति प्राप्त गरेका सवारी साधनले मात्र चीनबाट आयात भएका माल सामग्री रसुवागढी नाकामा लिन जान पाउने व्यवस्था मिलाइएपनि प्रक्रिया पूरा नगरी मनोमानी ढंगले आपूmखुसी सवारीसाधन सञ्चालन गरेकाले त्यस्तालाई मात्र कारवाही गरिएको ट्राफिक प्रहरी प्रमुख इन्द्रबहादुर घिसिङले बताए ।

माल सामग्री ढुवानीका लागि रसुवागढी जाने सवारी साधनले यातायात व्यवस्था विभागको अनुमतिपत्र साथमा अनिवार्य ल्याउन समेत सम्बन्धित सवारी धनीलाई प्रहरीले आग्रह गरेको छ । मालबाहक सवारीसाधनमा चालक र सहचालक मात्र बस्न पाउने प्रावधान विपरित अन्य व्यक्ति समेत राख्ने गरेको पाइएकाले त्यस्ता सवारी साधनलाई समेत कारवाहीको दायरामा ल्याइएको बताइन्छ ।

भारी वर्षाका कारण रसुवागढीदेखि स्याउबारीसम्म अधिकांश समय अवरुद्ध भइरहने सडक मार्ग नेपाल प्रहरी, सशस्त्र प्रहरी बल एवं नेपाली सेनालगायत सुरक्षा निकायको जनशक्तिले सुचारू गराएर मालवाहक सवारीसाधन आवतजावतमा सहज पार्दै आएको जिल्ला प्रहरी प्रमुख देवेन्द्र पाण्डेले जानकारी दिए । असार १ गतेदेखि १ हप्ताको अवधिमा भन्सार जाँचपास भएका ८० कन्टेनरलाई अवरूद्व सडक सञ्चालन गराई गन्तव्यतर्फ पठाइएको थियो ।

सो अवधिमा स्याउवारीदेखि रसुवागढीसम्म वर्षातले अवरूद्ध पारेको सडक २१ पटक खुल्ला गरिसकिएको जानकारी दिँदै प्रहरी प्रमुख पाण्डेले डिभिजन सडक कार्यालयले हाल त्यस क्षेत्रमा ३ वटा डोजर तैनात गरेका कारण पहिरो पन्छाउनमा सहजता आएको बताए ।

कोभिड–१९ नियन्त्रणका लागि स्थानीय प्रशासनले गत वैशाख २३ गतेबाट जारी गरेको निषेधाज्ञा पटक–पटक थपिँदै गएको र निषेधाज्ञाको अवधि असार १४ गतेसम्म कायम रहेको छ ।