पाकिस्तानमा सक्रिय आतंकवादी संगठन लश्कर–ए–तैयबाका संस्थापक हाफिज सईदको लाहौरस्थित घर बाहिर भयंकर विस्फोटको अनुसन्धानमा नयाँ पाटाहरू खुलेका छन् । 
 

लाहौर प्रहरीका अनुसार, यस भीषण विस्फोटमा लगभग ३० किलो विस्फोटक उपयोग गरिएको थियो । 

यसबाहेक विदेशमा बनेको सामान पनि प्रयोग गरिएको लाहौर प्रहरीले बताएको छ ।

विस्फोटका कारण घटनास्थलमा तीन फीट गहिरो र आठ फीट चौडा खाल्डो बनेको छ । यस विस्फोटका कारण १०० वर्गफूट क्षेत्र तहसनहस भएको छ । घरमै यो विस्फोट भएको भए पूरै घर ध्वस्त हुने सम्भावना थियो । 

विस्फोटमा हाफिज सईदको घरका शीशा चकनाचुर भए अनि भित्तामा पनि धेरै क्षति पुगेको छ । 

घटनास्थलबाट बेयरिङ, कीला र अन्य विस्फोटक सामान फेला परेका छन् । ३० किलो विस्फोटक कारभित्र राखिएको थियो । 

प्रहरीका एक उच्चपदस्थ अधिकारीले बताए, ‘हाई भ्याल्यु टार्गेटको घर नजिक प्रहरीको पिकेट छ । त्यसैले गर्दा विस्फोटक पदार्थ भरिएको यो वाहन घरनजिक पुग्न सकेन । प्रहरीलाई नै निशाना बनाइएको हाम्रो विश्वास छ ।’

आक्रमणमा कैयौं प्रहरी घाइते भएका छन् । उनीहरू हाफिजको घरको सुरक्षामा खटिएका थिए । 

आक्रमणमा परी तीनजनाको मृत्यु भइसकेको छ र २४ जना घाइते भएका छन् । 

घटनाको जिम्मेवारी कसैले लिइसकेको छैन । घरको सुरक्षा थप बलियो बनाइएको छ ।