कोरोना भाइरस संक्रमणको महामारीका बेला स्थानीय सरकारलाई सघाएबापत कञ्चनपुरको पुनर्वास नगरपालिकाले ‘सँगसँगै’ अभियानलाई सम्मान गरेको छ ।

बिहीवार आयोजित नगर सभामा कञ्चनपुरको १ नम्बर निर्वाचन क्षेत्रका युवाद्वारा सञ्चालित सँगसँगै अभियानलाई सम्मान गरिएको हो ।

नगर प्रमुख जीवन थापा र उपप्रमुख शारदा विष्टले सँगसँगै अभियानका संयोजक लक्ष्मी श्रेष्ठ, सदस्यहरू हिमेश थापा, रुपेश विक र अनुपमा महतरालाई संयुक्त रूपमा सम्मानपत्र हस्तान्तरण गरे ।

कोरोना महामारीका बेला स्थानीय सरकारलाई सघाउने उद्देश्यले गठित सँगसँगै अभियानले होम आइसोलेसनमा बसिरहेका संक्रमितलाई पोषिलो आहारा र स्वास्थ्य सामग्री दिने, चिकित्सकको परामर्शका लागि समन्वय गर्ने, स्वास्थ्य सामग्री र औषधि सहयोग गर्ने लगायतका काम गर्दै आइरहेको छ ।