अमेरिकाले आफ्ना शत्रुहरूको क्षेप्यास्त्रको जानकारी पाउन तथा तिनलाई ध्वस्त पार्न नयाँ तयारी गरिरहेको छ । 

त्यहाँको रक्षा कम्पनी लकहीड मार्टिनले ४.९ अर्ब डलरको ठेक्का हात पारेको छ । अब यस कम्पनीले यूएस स्पेस फोर्सका लागि तीनवटा मिसाइल वार्निङ स्याटेलाइट बनाउनेछ । 

लकहीड मार्टिनले यी स्याटेलाइटहरू सन् २०२८ सम्ममा अमेरिकी सरकारलाई सुम्पिनेछ । यस अवधिमा कम्पनीले स्याटेलाइट बनाउने, एसेम्बल गर्ने, परीक्षण गर्ने र गुणस्तरको जाँच गर्ने काम गर्नेछ । ह्यान्डओभरपछि कुनै समस्या नआओस् भनी सतर्कता अपनाइनेछ । 

अमेरिकाले पृथ्वीमा राडार लगाइसकेको छ र अब ऊ अन्तरिक्षमा पनि शत्रुहरूको क्षेप्यास्त्रमाथि नजर राख्नेछ । 

यी मिसाइल वार्निङ स्याटेलाइटहरूले पृथ्वीको जियोसिनक्रोनस अर्बिटमा ३५ हजार किलोमिटरको उचाइमा अमेरिकाको निगरानी गर्नेछन् । तीनैवटा स्याटेलाइटले अमेरिकाको हवाई सीमाको चारैतिर निगरानी गर्नेछन् । 

कुनै पनि शत्रु मुलुकले अमेरिकातर्फ ब्यालिस्टिक वा ट्याक्टिकल लोन्च गरेमा यी स्याटेलाइटहरूले त्यसको सबै सूचना उपलब्ध गराउनेछ । 

अमेरिकी सेनाका अनुसार, यी स्याटेलाइटहरूमार्फत अमेरिकामाथि हुन सक्ने अन्तर्महादेशीय ब्यालिस्टिक क्षेप्यास्त्रको आक्रमणको आरम्भिक जानकारी प्राप्त हुनेछ । यिनीहरूले पनडुब्बीबाट प्रहार गरिएका क्षेप्यास्त्रको सूचना पनि समयमै उपलब्ध गराउनेछन् ।