आसन्न १४ औं महाधिवेशनमा सभापतिमा उठ्ने बताएका नेपाली कांग्रेसका तीन नेता उपसभापति विमलेन्द्र निधि, महामन्त्री डा शशांक कोइराला र नेता प्रकाशमान सिंहबीच शुक्रवार दोस्रोपटक छलफल भएको छ । असार ८ गते मंगलवार निधिको निवासमा यी तीन नेताको छलफल भएको थियो । 

महामन्त्री कोइरालाको निवास महाराजगञ्जमा शुक्रवार मध्यान्ह भएको छलफल महाधिवेशनमा नयाँ समीकरण बनाएर जान विषयमा छलफल भएको नेताहरुले बताएका छन् । तर, उनीहरूबीच कुनै सहमति जुटिसकेको छैन । 

शुक्रवारको छलफलपछि नेता निधिले आफूहरूबीचको छलफलले देशभरका कार्यकर्तामा उत्साह थपिएको बताए ।

नेता प्रकाशमान सिंहले पनि छलफल सकारात्मक रहेको र आगामी दिनमा पुनः छलफल गरिने बताए । 

कांग्रेस संस्थापक नेताहरू बीपी कोइराला, गणेशमान सिंह र महेन्द्र नारायण निधिका परिवारका सदस्यहरूको गठजोडले कांग्रेसमा नयाँ तरंग सिर्जना गरेको छ ।

महामन्त्री कोइरालाले आफूहरुले थप छलफल गर्ने बताएका छन् । 

लामो समय सभापति शेरबहादुर देउवाको क्याम्पमा रहेका निधिले सभापतिमा उठ्ने अठोट लिएपछि कांग्रेसमा समीकरण परिवर्तनको संकेत देखिएको हो । कांग्रेसको महाधिवेशन भदौ १६ देखि १९ गतेसम्म काठमाडौंमा हुँदैछ । 

सभापतिका लागि केन्द्रीय सदस्य डा. शेखर कोइरालाले लामो समयदेखि गृहकार्य गरिरहेका छन् ।

नेत्री सुजाता कोइरालाले पनि सभापतिमा उठ्ने दाबी गरेकी छिन् । 

तर, कोइराला परिवारबाट एकमात्र उम्मेदवार बनाउने गरी गृहकार्य भइरहेको स्रोतको भनाइ छ ।

यसअघि शशांकलाई महामन्त्रीमा समर्थन गरेका शेखरले यसपटक आफूलाई सघाउन शशांकलाई आग्रह गरिरहेको स्रोतले बतायो । 

कोइराला परिवारबाट एउटा मात्र उम्मेदवार बनाउने रणनीति स्वरूप नै सुजाता कोइराले दाबी गरेको सम्बद्ध स्रोतले दाबी गर्‍यो ।