नेकपा एमालेका नेता माधवकुमार नेपाल पक्षले पार्टीमा सम्मानजनक एकता खोज्ने निष्कर्ष निकालेको छ ।

बुधवार नेपाल पक्षका केन्द्रीय कमिटी सदस्य र सांसदहरूको भेलाले पार्टी एकतामा जोड दिने निष्कर्ष निकालेको सचिव योगेश भट्टराईले जानकारी दिए ।

‘सम्मानजनक एकता गर्न कार्यदल पुनः सक्रिय बनाउने र एकताका लागि पहल गर्ने छलफल भयो,’ सचिव भट्टराईले लोकान्तरसँग भने, ‘एकताका लागि कार्यदलले पार्टी अध्यक्षसँग कुरा गर्नेछ ।’

भेलामा पार्टीमा विवाद र आरोप–प्रत्यारोप गरेर एकता बिगार्नतिर नलाग्न नेता–कार्यकर्तालाई सुझाव दिइएको छ ।

भेलापछि नेता नेपाल उपाध्यक्ष भीम रावललाई भेट्न उनकै निजी निवास पुगेका थिए । उपाध्यक्ष रावल नेता नेपालको पक्षबाट कार्यदल संयोजक रहेका थिए ।

अध्यक्ष केपी शर्मा ओलीको अध्यक्षतामा बसेको एमाले केन्द्रीय कमिटी बैठकले कार्यदलले गरेको १० बुँदे सहमतिलाई अनुमोदन गर्दै कार्यदल विघटन गरिसकेको छ ।