कृषि ज्ञान केन्द्र झापाले आर्थिक वर्ष २०७७/७८ मा जिल्लाका कृषकलाई करीब २ करोड रुपैयाँ अनुदान उपलब्ध गराएको छ ।

केन्द्रले कृषि कार्यक्रमअन्तर्गत विभिन्न ११ शीर्षकमा १५९ व्यक्ति, कृषि समूह, कृषि सहकारी, फार्म लगायतलाई १ करोड ९९ लाख ५४ हजार ९०० रुपैयाँ अनुदान उपलब्ध गराएको कृषि ज्ञान केन्द्र झापाका कृषि अर्थविज्ञ शालिकराम भट्टराईले जानकारी दिए ।

मागमा आधारित कार्यक्रमअन्तर्गत ५ पालिकाका किसानलाई २ लाख ५० हजार, कागती खेतीमा ७ पालिकाका १२ फार्मलाई २१ लाख २३ हजार ३००, व्यावसायिक फलफूल बगैंचा स्थापनार्थ ४ पालिकाका ५ फार्मलाई ९ लाख १ हजार १०० अनुदान उपलब्ध गराइएको छ ।

बीउबिजन आत्मनिर्भर कार्यक्रमअन्तर्गत ३ पालिकाका ४ फार्मलाई ३ लाख ९६ हजार ८००, बगरखेती प्रवद्र्धनका लागि ६ पालिकाका १० फार्मलाई १० लाख १ हजार, जैविक तथा वानस्पतिक विषादी प्रयोग विस्तार कार्यक्रमअन्तर्गत ६ पालिकाका फार्मलाई ६ लाख, महिला, दलित, विपन्न तथा पिछडिएको समुदाय लक्षित कार्यक्रमअन्तर्गत ८ पालिकाका १० फार्मलाई १० लाख अनुदान दिइएको कृषि अर्थविज्ञ भट्टराईले बताए ।

कृषि हाटबजार तथा संकलन केन्द्र निर्माण गर्न ३ पालिका र १ सहकारी संस्थालाई ४० लाख अनुदान उपलब्ध गराइएको छ । गौरादह नगरपालिका, गौरीगञ्ज गाउँपालिका, बुद्धशान्ति गाउँपालिका र टागनडुब्बा सामुदायिक साना किसान कृषि सहकारी संस्थालाई १०/१० लाख रुपैयाँका दरले दिइएको कार्यालयले जनाएको छ ।

रैथाने बाली उत्पादन प्रवद्र्धन कार्यक्रमअन्तर्गत मेचीनगर–१० की रुपा पौडेललाई १ लाख दिइएको छ । नमूना कृषि फार्म स्थापनाका लागि ८ पालिकाका १० फार्मलाई २६ लाख ६९ लाख ३०० र कृषि यान्त्रिकीकरण, औजार खरिदका लागि ८२ व्यक्ति/समूहलाई ७० लाख १३ हजार ४०० अनुदान सहयोग उपलब्ध गराइएको कार्यालयले जनाएको छ ।

कार्यालयले न्यूनतम १८ हजार ७०० देखि अधिकतम १ लाख २७ हजार ७०० अनुदान दिइएको बताएको छ ।