कृषि तथा पशुजन्य उत्पादनको सहज बजारीकरणको लागि महिला सहकारीलाई २८ वटा ढुवानीका साधन उपलब्ध गराइएको छ । 

हेफर इन्टरनेशनल नेपालले पाँच वटा प्रदेशका १६ जिल्लाका लागि उक्त गाडी दिएको हो । 

प्रदेश एकमा एक जिल्ला, प्रदेश दुईमा ५, बागमतीका ६, गण्डकीका ४, लुम्बिनीका १२ वटा कृषि एम्बुलेन्सका रूपमा प्रयोग गर्ने गाडी महिला सहकारीलाई हस्तान्तरण गरेको हो । 

कृषि एम्बुलेन्स मंगलवार लुम्बिनी प्रदेशका मुख्यमन्त्री शंकर पोखरेलले हस्तान्तरण गरे । हेफरले ४३ जिल्लामा दुई लाख ७६ हजार भन्दा बढी गरीब तथा पछाडि परेका परिवारको क्षेत्रमा काम गर्दै आएको छ । 

‘कृषि एम्बुलेन्स’ले किसानले उत्पादन गरेका वस्तु घरघर पुगेर संकलन गरी बजारसम्म पुर्‍याउन सहयोग गर्छ । 

हेफर इन्टरनेशनलका कार्यकारी निर्देशक डा. तीर्थराज रेग्मीले देशमा कृषि उत्पादन वृद्धिको लागि किसान संगठित गर्दै उत्पादन वृद्धिमा सहजीकरण गरेको बताए । 

‘अहिले नेपालका श्रम शक्तिको अभाव छ’ मुख्यमन्त्री पोखरेलले भने, ‘व्यवसायमा प्रविधिलाई जोड दिँदै आधुनिक खेती प्रणालीबाट देशलाई अगाडि बढाए नेपालको कृषि क्षेत्रमा समृद्धि हासिल गर्न सकिन्छ ।’ 

बुटवल उपमहानगरपालिका प्रमुख शिवराज सुवेदीले किसानले उत्पादन गरेको सबै उत्पादनको बजारको ग्यारेन्टी लिने गरी बुटवलमा कृषिमैत्री काम भइरहेको जानकारी दिए ।