इरान र इजरायलको प्रोक्सी युद्धमा होमिए अमेरिका र बेलायत

अघिल्लो साता इजरायलको तेल ट्यांकर मर्सर स्ट्रीटमा ड्रोन आक्रमणपछि इरान यसमा दोषी रहेको भन्दै कठोर बयानहरू आइरहेका छन् । 


Advertisement

बेलायत, अमेरिका र इजरायलले एकमुख लागेर इरानलाई आक्रमणको जिम्मेवार ठहर गरेका छन् तर तेहरानले यसलाई खारेज गरेको छ । यसै बहानामा आफ्नो हितमा घात गरिएमा कठोर जवाफ फर्काउने इरानले बताएको छ । 


Advertisement

खासमा के भइरहेको छ र पर्दापछाडि के हर्कत गरिँदैछ ? 

गत बिहीवार मध्यम आकारको तेल ट्यांकर एमभी मर्सर स्ट्रीट तान्जानियाको दार एस सलामबाट ओमान खाडीमा रहेको संयुक्त अरब अमिरातको फुजैराह बन्दरगाहतिर तेल लिन जाँदैथियो । 


Advertisement

एमभी मर्सर स्ट्रीटमा लाइबेरियाको झण्डा राखिएको छ । यसको स्वामित्व एक जापानी कम्पनीसँग छ । तर इजरायलको जोडियाक मेरिटाइमले यसको सञ्चालन गर्छ । 

त्यही दिन यस तेल ट्यांकरमा ड्रोनबाट आक्रमण गरिएको थियो र त्यस आक्रमणमा जहाजका चालक दलका दुई सदस्यको मृत्यु भएको थियो । 

मर्नेमा एक रोमानियाली र अर्का बेलायती नागरिक थिए । 

तेल ट्यांकरले खतराको सन्देश पठाएपछि अमेरिकी जलसेनाका दुई युद्धपोतले त्यसलाई सुरक्षित स्थानतर्फ पठाएका थिए । 

यही वर्ष इजरायलका विभिन्न व्यापारिक जहाजहरूलाई आक्रमणको तारो बनाइएको छ । 

ती सबै आक्रमणको जिम्मेवारी इरानमाथि थोपरिएको छ भने तेहरानले प्रत्येकपटक यी आरोप खारेज गरेको छ । 

गत अप्रिल महिनामा रक्तसागरमा इरानी सेनाको जहाज साविजमा रहस्यमय विस्फोट भयो । इजरायलमाथि त्यसको शंका गरियो । 

खासमा यो इजरायल र इरानबीचको छाया युद्धको एक अंग हो ।

यस खतरनाक खेलमा इरानका आणविक वैज्ञानिकहरूको हत्यादेखि लिएर इरानको आणिवक भट्टीलाई बर्बाद गर्ने कोशिशसम्म भएका छन् । ती सबैमा इजरायलको हात रहेको बताइएको छ । 

तर मर्सर स्ट्रीट घटनाअघि व्यापारिक जहाजहरूमाथिको आक्रमणमा कसैको पनि मृत्यु भएको थिएन । 

मर्सर स्ट्रीटमा एक बेलायतीको पनि ज्यान गएकाले संयुक्त राष्ट्रसंघ सुरक्षा परिषद्को एक स्थायी सदस्य बेलायत पनि यसमा मुछिन पुगेको छ । 

बेलायतका प्रधानमन्त्री बोरिस जोनसनले मर्सर स्ट्रीटमा भएको आक्रमणलाई अस्वीकार्य बताउँदै इरानले आफ्नो कार्यको परिणाम भोग्नुपर्ने बताए । 

इरानका राजदूत मोहसिन बहारवाँदलाई बेलायतको परराष्ट्र मन्त्रालयले बोलाएर अन्तर्राष्ट्रिय जहाजलाई जोखिममा पार्ने घटना तेहरानले तत्कालै रोक्नुपर्ने बतायो । 

इरानले यसरी आफ्ना राजदूतलाई बोलाएको घटनाको कठोर आलोचना गर्दै बेलायतलाई प्रमाण दिन भनेको छ । 

त्यसपछि इरानको परराष्ट्र मन्त्रालयले बेलायतका राजदूतलाई बोलाएर बेलाउत, अमेरिका र इजरायलले आधारहीन हल्ला फैलाएको बतायो । 

इरानसँगको आणविक सम्झौतालाई पुनर्बहाली गर्नका लागि कोशिश चलिरहेको बेलामा यी आक्रमणहरू भएका हुन् । 

इजरायलको गुप्तचर संस्था मोसादले इरानका सुरक्षा प्रतिष्ठानहरूमा गहिरो पहुँच बनाएको छ । त्यसैले उसको धम्कीलाई तेहरानमा निकै गम्भीर रूपमा लिइन सक्छ । 

मर्सर स्ट्रीट घटनाका लागि इरान जिम्मेवार रहेको प्रमाण सार्वजनिक गर्ने कि नगर्ने भन्ने विषयमा पश्चिमी सरकारहरू दुविधामा छन् । 

उनीहरूले प्रमाण गोप्य रूपमा जुटाउनुपर्ने हुन्छ । प्रमाणहरू संवेदनशील हुनाले बेलायत र अमेरिकाका गुप्तचर निकायले इरानको नजरमा ती प्रमाणहरू नपरून् भन्ने चाहेका छन् । 

तर उनीहरूले प्रमाण सार्वजनिक गर्न नसकेमा इरानलाई नगरेको अपराधको सजाय दिनका लागि बुनिएको षड्यन्त्रको तानाबाना भनी सामाजिक सञ्जालमा धेरैले भन्नेछन् । 
 

एजेन्सी
एजेन्सी

लेखकबाट थप...

कमेन्ट गर्नुहोस्