नेपाल राष्ट्र बैंकका गभर्नर महाप्रसाद अधिकारीले मौद्रिक नीतिको तयारी भइरहेको बताएका छन् । 

बुधवार अर्थ समितिमा भएको छलफलका क्रममा उनले राष्ट्र बैंकले आफ्नो तर्फबाट मौद्रिक नीतिको तयारी गरिरहेको बताएका हुन् ।

राष्ट्र बैंकले मौद्रिक नीति जारी गर्न ढिलाइ भएपछि अहिले यसप्रति चासो बढ्दै जाँदा गभर्नर अधिकारीले  बजेटले प्रक्षेपण गरेका कतिपय लक्ष्यहरूलाई मध्यनजर गर्दै मौद्रिक नीति आउने बताएका हुन् ।

गभर्नर अधिकारीले मौद्रिक नीतिले केही प्रभावित क्षेत्रहरूलाई प्राथमिकतामा राख्ने बताए । 

उनले भने, 'पर्यटन, एभिएसन, सार्वजनिक यातायातलगायतमा अझै चुनौतीपूर्ण अवस्था छ, यसलाई मध्यनजर गरिन्छ ।'

मौद्रिक नीतिले सहुलियतलाई निरन्तरता दिनेसमेत उनले बताए ।

उनले भने, 'सबै कुरालाई हेर्दा केही सजगता अपनाउनुपर्ने देखिन्छ, पुनर्कर्जालाई निरन्तरता दिने सोचमै छौं ।'

गभर्नर अधिकारीले व्यवसायमा परेको प्रभावका आधारमा कर्जा नवीकरण, पुनर्तालिकीकरण गर्नुपर्ने देखिएको बताए ।