राष्ट्रिय सभाको बुधवारको बैठकमा शून्य समयमा बोल्दै सांसदहरूले समसामयिक विषयमा सरकारको ध्यानाकर्षण गराएका छन् ।

बैठकमा सांसद उदया शर्मा पौड्यालले ट्याक्सीले मनोमानी भाडा असुल्ने गरेको भन्दै त्यसलाई नियमन गर्न सरकारको ध्यानाकर्षण गराइन् । मिटरमा भाडादर निर्धारण गर्नुपर्ने उनको भनाइ छ । 

सांसद कविता बोगटीले दार्चुलाका जयसिंह धामी प्रकरणमा सरकारले भारतीय पक्षकै पक्षपोषण गररेको भन्दै आमनेपालीलाई सशंकित बनाएको बताइन् । 

घटनाको छानबिन गर्न संसदीय समितिको गठन गर्न पनि उनले माग गरिन् ।

सांसद कोमल वलीले देशमा कलाकारहरूले ठूलो योगदान गर्ने भए पनि उनीहरूलाई अप्ठ्यारो परेको बेलामा सरकारले सहयोग नगर्ने गरेको दुखेसो गरिन् । 

‘अहिले एकजना चर्चित कलाकार चलचित्रकर्मी, हास्य व्यंग्यकर्मी, गीत संगीतमा सहभागी कलाकार हुनुहुन्छ कलाकार पल्पसा डंगोल, मिर्गौला फेल भएका कारणले जीवन र मृत्युसँग लडिरहनुभएको छ,’ उनले भने, ‘कलाकार पल्पसा डंगोलको स्वास्थ्योपचारका लागि सरकारले सक्दो सहयोग गरोस् भनेर यही सदनबाट प्रधानमन्त्रीज्यूसँग माग गर्दछु ।’

सांसद खीमकुमार विकले कोभिड–१९ विरुद्धको खोपको आपूर्ति राम्रो भए पनि व्यवस्थापकीय पक्ष सुधार गर्नुपर्ने बताए । वैदेशिक रोजगारीमा जाने युवाहरूलाई खोप अनिवार्य भएकाले युवाहरूले झन्झट भोगेको भन्दै युवाहरूलाई सहज उपलब्धता गराउन सरकारको ध्यानाकर्षण गराए । 

‘वैदेशिक रोजगारमा जाने युवाहरूले अनिवार्य रुपमा कोभिड–१९ विरुद्धको खोप लगाउनुपर्ने, खोपको प्रमाणपत्र लिनुपर्ने र त्यो प्रमाणपत्रमा अनिवार्य रुपमा क्यूआर कोड हुनुपर्ने त्यसो नहुँदा रोजगारदाता कम्पनी, देशहरूले मान्यता नदिएका कारण अत्यन्त झन्झटिलो भइरहेको छ,’ उनले भने, ‘युवाहरू निराश छन्, यो प्रक्रियामा जानका लागि सरकारको ध्यानाकर्षण गराउँछु ।’

सांसद खीमलाल देवकोटाले सिन्धुपाल्चोकको मेलम्ची बाढीबाट प्रभावितलाई व्यवस्थापन गर्न तिनै तहको सरकारलाई ध्यानाकर्षण गराए । मौलिक हकसम्बन्धी कानून निर्माण गर्नुपर्नेमा पनि सरकारको ध्यानाकर्षण गराए । साथै विचाराधीन अवस्थामा रहेका विधेयकलाई संसदमा पेश गर्न उनले अनुरोध गरे । 

सांसद चक्रप्रसाद स्नेहीले सरकारले भूमिसम्बन्धी समस्या समाधान गर्न गठित आयोग खारेजी गरेर गलत गरेको टिप्पणी गरे । 

सांसद जगप्रसाद शर्माले शैक्षिक क्षेत्रमा कार्यरत मजदुरहरूको जीवन निर्वाहमा समस्या परेको भन्दै त्यसतर्फ सरकारले ध्यान दिनुपर्ने बताए । उनले विशेषगरी बाल शिक्षिका, सहायक लेखापाल र सहयोगीलाई जीवन निर्वाह गर्न पुग्ने गरी पारिश्रमिक व्यवस्था गर्नुपर्नेमा जोड दिए ।