पञ्च फुरण आलु र चाम्रे खाने हाम्रो पुरानो संस्कार हो । पहाडी जिल्लामा यो परिकार अहिले पनि निकै लोकप्रिय छ ।

खेतालालाई होस् या ज्वाइँ मेजमानी नै किन नहोस्, झटपट खाजाका लागि यो पञ्च फुरण आलु र चाम्रे निकै उपयोगी र मन पराइएको सेट हो ।

पञ्च फुरण आलुको चर्चरे बनाउन चाहिने सामाग्रीः

२ वटा मध्यम खालको रातो आलु, तोरीको तेल ६० एमएल, पञ्च फुरण मसला (मेथि, जिरा, सोप, जंगली सेलरीको गेडा/राधुनी अथवा सर्सोको गेडा, प्याजको गेडा/निगेला/कलञ्जी) १ चिया चम्चा, नून स्वाद अनुसार, सुकेको खुर्सानी ४ पिस, बेसार आधा चिया चम्चा ।

पञ्च फुरण आलुको चर्चरे बनाउने विधिः

आलुलाई पखालेर ताछ्ने र पातलो डाइमण्ड सेभमा काट्ने । पानीमा भिजाएर १ साइड लगाउने । बाक्लो कराइ तताएर तेल हाल्ने र पन्च फुरण फुराउने । सँगै सुकेको खुर्सानी पनि पड्काउने र काटेको आलु ओइराइदिने । एकछिन भुट्नासाथ पानी सुक्खा हुन्छ र बेसार, नून, खुर्सानीको धुलो हालेर चलाउँदै छोपेर पकाउने ।

चाम्रे बनाउन चाहिने सामग्रीः

कुनै पनि ब्राण्डको लामो साइजको बासमती चामल–आधा किलो, शुद्ध नेपाली घ्यू ३ चिया चम्चा, बेसार १ चिया चम्चा, चिनी आधा कप, पानी आवश्यकता अनुसार ।

चाम्रे बनाउने विधिः

सर्वप्रथम चामल पखालेर एकछिन भिजाउने । प्रेसर या बाक्लो कसौडी तताएर घ्यू पगाल्ने र मेथि फुराउने । पानी छानेर चामल भुट्ने र राम्ररी पानी सुक्खा हुनासाथ आवश्यकता अनुसार पानी हाल्ने र चिनी हालेर चलाउने । मध्यम आचमा ओयल डन हुने गरी पकाउने र तातो–तातो पञ्च फुरण चर्चरे आलु, गोलभेडाको सिलाउटे अचार, काक्रो, मुला, गाँजरको अचारको साथमा सर्भ गर्ने ।