महानगरीय ट्राफिक प्रहरी महाशाखाले नक्कली सवारी चालक अनुमतिपत्र (स्मार्ट लाइसेन्स) सहित २ जनालाई नियन्त्रणमा लिएको छ ।

पक्राउ पर्नेमा ललितपुर महानगरपालिका–२ बुङमती घर भई हाल जोरपाटी बस्ने ४६ वर्षीय प्रेम तुलाधर र खोटाङ ऐंशेलुखर्क गाउँपालिका–६ घर भई हाल मुलपानी बस्ने ३१ वर्षीया कल्पना दाहाल छन् ।

यातायात कार्यालयबाट जारी गरिने सवारी चालक अनुमति पत्रका नगदी रसिदहरू केही व्यक्तिले सरकारी कागजात दस्तखत कीर्ते गरी रकम लिने गरेको भन्ने विशेष सूचनाका आधारमा ट्राफिक प्रहरीले उनीहरूलाई कागेश्वरी मनोहरा नगरपालिका–६ मुलपानीस्थित राईजिङ एक्सपोर्ट ड्राईभिङ सेन्टरबाट पक्राउ गरेको ट्राफिक महाशाखाका प्रमुख एसएसपी जनक भट्टराईले जानकारी दिए ।

तुलाधरले आफ्नै नाममा रहेको ०१–००–९८५७६९५३ नम्बर भएको सवारी चालक अनुमति पत्रको नक्कली नगदी रसिद ट्राफिक प्रहरीको चेकिङमा दिएको थिए ।

तुलाधर पक्राउ परेपछि उनकै बयानका आधारमा ट्राफिक प्रहरीले दाहाललाई मुलपानीबाट नियन्त्रणमा लिएको छ । दाहालको साथबाट गीताकुमारी ठकुरीको नाममा जारी भएको सवारी चालक अनुमतिपत्र नम्बर ०१–०६–००६८३४३८ भएको नक्कली नगदी रसिद समेत बरामद गरेको छ । 

ट्राफिक प्रहरीका अनुसार उनीहरूले दर्जनौं व्यक्तिसँग रकम लिएर नक्कली लाइसेन्स रसिद दिई कीर्ते ठगी गर्ने काम गर्दै आएका थिए ।

पक्राउ परेका दुवै जनालाई थप अनुसन्धान एवं कानूनी कारबाहीको लागि प्रहरी वृत्त सिंहदरवारमा बुझाएको ट्राफिक महाशाखाका प्रवक्ता प्रहरी उपरीक्षक संजिव शर्मा दासले जानकारी दिए ।