एमालेले सभामुख अग्नि सापकोटा र निर्वाचन आयोगलाई विपक्षी बनाएर दर्ता गरेको रिट निवेदनको पेशी प्रधानन्यायाधीश चोलेन्द्रशमशेर जबराको इजलासमा तोकिएको छ । 

भदौ २० मा पनि पेशी चढेको यो रिट अन्तिममा हेर्न नभ्याइनेमा राखिएको थियो । आज दोस्रो पटक प्रधानन्यायाधीशकै इजलासमा उक्त मुद्दाको पेशी तोकिएको हो ।

एमालेले कारवाही गरेको १४ जना सांसदको पद रिक्त भएको सूचना टाँस नगरेर सभामुखले एमाले विभाजनमा सहयोग गरेको र निर्वाचन आयोगले पनि पार्टीले कारवाही गरेका सांसदलाई सनाखत गराएर पार्टी दर्ता गर्न दिएको निर्णय गैरकानूनी रहेको दाबी गरेर मुद्दा दर्ता भएको थियो ।

एमालेले १४ जना सांसदलाई गरिएको कारवाही सदर हुनुपर्ने र निर्वाचन आयोगमा दर्ता भएको नेकपा (एकीकृत समाजवादी)को दर्ता खारेज हुनुपर्ने माग गरेर एमाले अध्यक्ष केपी ओलीले अदालतमा मुद्दा दर्ता गरेका थिए । 

नेकपा (एकीकृत समाजवादी) दल कायम रहँदा एमालेलाई अपुरणीय क्षति पुग्ने दाबी ओलीले रिटमा गरेका छन् ।