अपहरणको आरोपमा विमला वलीले शंकर पोखरेलविरुद्ध दिइन् किटानी जाहेरी

प्रकाश आचार्य
प्रकाश आचार्य

लोकान्तर संवाददाता आचार्य लुम्बिनी प्रदेशबाट रिपोर्टिङ गर्छन् ।

फाइल फोटो

लुम्बिनी प्रदेशका पूर्व मुख्यमन्त्री शंकर पोखरेलविरुद्ध सांसद विमला खत्री वलीले अपहरण तथा शरीर बन्धक कसूरमा जाहेरी दिएकी छन् ।


Advertisement

प्रदेश सभा सदस्य वलीले पोखरेलसहित एमाले प्रमुख सचेतक भूमिश्वर ढकाल, युवा संघका सचिवालय सदस्य तिरण गौतम र एमाले दाङका नेता मानबहादुर रावलले आफूलाई अपहरण गरेर बन्धक बनाएको भन्दै प्रहरीमा निवेदन दिएकी हुन् ।


Advertisement

इलाका प्रहरी कार्यालय बुटवलका प्रमुख डीएसपी मदन कुँवरले बुटवलमा सोमबार दिएको उजुरी बुधवार दाङ पठाइएको लोकान्तरलाई जानकारी दिए । निवेदन लिएर माओवादी केन्द्रका प्रमुख सचेतक तुलाराम घर्ती र सांसद विमला वली प्रहरी कार्यालय पुगेका थिए । 

यसअघि राजनीतिक विषय भएकाले उजुरी नदिने बताउँदै आएकी वलीले घटनाको डेढ महिनापछि उजुरी दिएकी हुन् ।


Advertisement

कुँवरले लोकान्तरसँग भने, ‘सोमबार उहाँहरूले निवेदन लिएर आउनुभएको थियो । घटना दाङमै भएकाले उतै पठाएको छौं ।’

दाङका प्रहरी प्रमुख सुरेन्द्र काफ्लेले अझैसम्म उजुरी जिल्ला आइनपुगेको बताए । 

इलाका प्रहरी कार्यालय बुटवलका अनुसार वलीले आफूलाई साउन १५ गतेदेखि ५ दिनसम्म पोखरेल दाङबाट ल्याएर बन्धक बनाएको आरोप लगाएकी छन् । 

बुटवल प्रहरीले भने, घटनास्थल दाङ भएकोले त्यहीँबाट निवेदनको प्रक्रिया अगाडि बढाउने बताएको छ ।

सूर्य चिह्नबाट निर्वाचित वलीले नेकपा एकता भंग भएपछि माओवादी केन्द्र रोजेकी थिइन् । वलीसँग कुराकानी गर्न खोज्दा सम्पर्क हुन सकेन । 

माओवादी केन्द्रका प्रमुख सचेतक तुलाराम घर्तीले सांसद वलीले अपहरण तथा शरीर बन्धकविरुद्ध सोमवार इलाका प्रहरी कार्यालय बुटवलमा किटानी जाहेरी बुझाएको बताए ।

मुलुकी अपराध संहिता २०७४ अनुसार अपहरण तथा शरीर बन्धकमा पीडितले ६ महिनासम्म जाहेरी दिन पाउने कानुनी व्यवस्था छ । वलीले दिएको उजुरीअनुसार अदालतले कसुर ठहर गरेमा पोखरेलसहित ४ जनालाई ७ वर्षदेखि १० वर्षसम्म कैद र सत्तरी हजारदेखि १ लाख रुपैयाँसम्म जरिवाना हुन सक्नेछ । 

विमला पछिल्लो केही महिनायता कहिले एमाले त कहिले माओवादी भनेर चर्चामा रहँदै आएकी छन् ।

प्रकाश आचार्य
प्रकाश आचार्य

लेखकबाट थप...

कमेन्ट गर्नुहोस्