आफ्नो आधार इलाका मान्दै आएको रुपन्देहीको बुटवलमा एमालेले बुधवार पार्टी अध्यक्ष केपी शर्मा ओली सहितका प्रभावशाली नेताको सहभागितामा अगुवा कार्यकर्ता भेला राख्यो । 

पार्टी विभाजनपछि पहिलोपटक आयोजित कार्यकर्ता भेलालाई चासोका साथ हेरिएको थियो ।

देशका धेरै जिल्लामा बुधवार भएका कार्यकर्ता भेलामध्ये ओलीले रुपन्देहीलाई महत्त्व दिएर बुटवल आए । 

अध्यक्ष ओलीसहित पार्टी उपमहासचिवद्वय विष्णु पौडेल र घनश्याम भुसालको सहभागिता भएको भेलाले एमाले कमजोर नभएको प्रस्टसँग देखियो । पौडेल र भुसालको गृहजिल्ला रुपन्देही नै हो । भेलाका सहभागी कार्यकर्ता उत्साहित देखिए ।

लामो समय ओली र भुसालले एउटै मञ्चबाट सम्बोधन गरे । भेलामा रुपन्देहीका १६ वटै स्थानीय तहबाट २० हजारभन्दा बढी अगुवा कार्यकर्ताको उत्साहजनक सहभागिता रहेको एमालेले जनाएको छ । सिमसिम पानी परिरहे पनि कार्यकर्ता यताउता भएनन् । 

खराब मौसमका कारण निर्धारित समयभन्दा केही ढिलो कार्यक्रममा आएका ओली नेताहरूको सम्बोधनले उत्साहित देखिए । लामो समयपछि ओली र भुसाल एउटै मञ्चमा देखिएका थिए ।

उपमहासचिव घनश्याम भुसालले भाषण गर्दा कार्यकर्ताको ताली र ओलीको ओठमा मन्द मुस्कान देखियो । कार्यक्रम सञ्चालक एमाले रुपन्देहीका सचिव जागेश्वरदेवी चौधरीले भुसाललाई भाषण छोट्याउन आग्रह गर्दा पनि भुसाल बोलिरहे । 

भुसालले २०७४ सालको निर्वाचनमा जस्तै अबको निर्वाचनमा पनि एमालेले वर्चश्व ल्याउने भनेर बोल्दा कार्यकर्ताको तालीको गडगडाहट थियो ।

भुसालले भाषण गर्दा ओली घडी हेर्दै मुस्कुराइरहे । कलाकार बैकुण्ठ महत र प्रिया भण्डारीले ‘समय अभावले गीत छोट्याउँछौं’ भन्दा समेत अध्यक्ष ओलीले पूरा गाउन कलाकारद्वय महत र भण्डारीलाई आग्रह गरे । भुसालले पनि विगतभन्दा उत्साहित भएर सम्बोधन गरे ।

एमाले फुटेको नभई पछारिएको बताउँदै भुसालले अब धुलो टकटकाएर एमाले उठ्ने बताए । एमाले ठूलो चोटबाट पछारिए पनि एमाले देशको प्रमुख शक्ति नै रहेको भुसालले बताउँदा कार्यकर्तालाई हौसला मिलेको बताउँछन् ।

कार्यक्रममा पूर्व अर्थमन्त्री समेत रहेका उपमहासचिव पौडेलले बुधवारको कार्यक्रम एमालेको अगुवा कार्यकर्ता भेला मात्र रहेको बताए । ‘यो एमालेको अगुवा कार्यकर्ता भेला मात्र हो । आमसभा होइन । सभा गरेको भए जनसहभागिता कति हुन्छ कति !’ पौडेलले कार्यकर्तालाई उत्साहित गर्दै भने ।

केही स्वार्थी तत्वहरू पार्टीबाट बाहिर हुँदैमा एमाले विभाजन भएको मान्न नसकिने पौडेलले बताए । कार्यकर्तालाई निरास नहुन आग्रह गर्दै पौडेलले भने, ‘माधव नेपालको झुण्डप्रति चिन्ता लिनु पर्दैन । एमालेले गल्ती गर्दैन । जनताको मनमा घर बनाएर चुनाव जित्छौं । वामपन्थी भन्दै कांग्रेसको पछाडि लागेर माधव नेपालले हास्यास्पद काम गरे ।’

कार्यक्रममा पूर्व मन्त्री समेत रहेका एमाले नेता टोपबहादुर रायमाझीले एमाले फेरि सरकारमा आउन जरुरी रहेको बताए । ‘लोकतान्त्रिक चुनावको माध्यमबाट असफल पार्टी र नेतालाई ध्वस्त बनाउनुपर्छ । हामीहरू पुनः सत्तामा आउन जरुरी छ । हामी पुनः टेस्ट हुन आवश्यक छ,’ उनले भने ।

रायमाझीले गठबन्धनले सफल रूपमा चलिरहेको सरकारलाई असफल बनाउने चेष्ठा गरेको आरोप लगाउँदै त्यसलाई असफल गराउनुपर्ने बताए । उनले भने, ‘विगतमा देशको नेतृत्व गरिसकेका र पार्टीको नेतृत्व गरिसकेका असफल नेताहरूको महागठबन्धन गरेर सफल नेता र सफल पार्टीलाई सम्पूर्ण विदेशी शक्ति लागेर जुन चेष्ठा गरेका छन्, त्यसलाई असफल पार्नुपर्छ ।’ 

१ घण्टा भाषण गरेका ओलीले माधव नेपाललाई गरीबका गीतमा जस्तै गरीबका आँसुले पोल्ने बताए । उनले अन्तिममा कार्यकर्तालाई निराश नहुन भन्दै कोरोना महामारीबाट सचेतना अपनाउँदै बेसारपानी, तातोपानी र दूधमा बेसार राखेर खान समेत सुझाव दिए ।