अघिल्लो महाधिवेशनमा आमन्त्रितसहित १ सय ३५ सदस्यीय केन्द्रीय समिति रहेको कांग्रेसको यो महाधिवेशनमा १ सय ६१ सदस्यीय केन्द्रीय कार्यसमिति हुने गरी विधानमा व्यवस्था गरिएको छ ।

कांग्रेस केन्द्रीय समितिमा सभापति एक, उपसभापति दुई, महामन्त्री दुई, सहमहामन्त्री आठ गरी प्रत्यक्ष निर्वाचित १३ पदाधिकारी हुन्छन् । सहमहामन्त्रीको निर्वाचन भने समानुपातिक एवं समावेशी सिद्धान्तको आधारमा हुनेछ ।

१४औं महाधिवेशनका लागि संशोधन गरिएको विधानमा महिला कोटाबाट एक, आदिवासी जनजाति कोटाबाट एक, दलित कोटाबाट एक, मधेसी कोटाबाट एक, खस आर्य कोटाबाट एक, थारू कोटाबाट एक, मुस्लिम कोटाबाट एक र पीछडिएको क्षेत्रबाट एक जना गरी आठ जना सहमहामन्त्री हुने व्यवस्था छ ।

पदाधिकारीका रूपमा रहने कोषाध्यक्ष भने निर्वाचित सदस्यमध्यबाट सभापतिले मनोनित गर्ने व्यवस्था छ । केन्द्रीय सदस्यहरुमा प्रत्यक्ष निर्वाचित कोटा ३५ जना छ भने प्रत्यक्ष निर्वाचित महिला कोटा ९ जना रहेको छ ।

प्रत्येक प्रदेशको प्रतिनिधित्व हुने गरी प्रदेश कोटाबाट एक महिलासहित तीन जनाको दरले २१ जना निर्वाचित हुन्छन् । १४औं महाधिवेशनमा समानुपातिक समावेशीको सिद्धान्तका आधारमा निर्वाचित हुने केन्द्रीय सदस्यको संख्या ५४ जना रहेको छ । समानुपातिक समावेशीको आधारमा निर्वाचित हुने ५४ जनामध्ये दलित महाधिवेशन प्रतिनिधिबाट ४ महिलासहित ९ जना हुन्छन् भने आदिवासी जनजाति महाधिवेशन प्रतिनिधिबाट ७ महिलासहित १५ जना निर्वाचित हुने व्यवस्था छ ।

यसै गरी, खसआर्य महाधिवेशन प्रतिनिधिमध्येबाट ६ महिलासहित १३, मधेसी महाधिवेशन प्रतिनिधिबाट ४ महिलासहित ९, थारू महाधिवेशन प्रतिनिधिमध्येबाट २ महिलासहित ४, मुस्लिम महाधिवेशन प्रतिनिधिमध्येबाट १ महिलासहित ३ र पीछडिएको क्षेत्रबाट आएका महाधिवेशन प्रतिनिधिमध्येबाट १ जना केन्द्रीय सदस्यमा निर्वाचित गरिने विधानमा व्यवस्था गरिएको छ ।

कांग्रेस केन्द्रीय कार्यसमिति सदस्यमा अल्पसंख्यक र अपांगता भएको कोटाबाटा २ जना निर्वाचित हुने व्यवस्था छ । केन्द्रीय सभापतिले समावेशी हुने गरी ३३ जना सदस्य मनोनित गर्न पाउने व्यवस्था छ । सभापतिले केन्द्रीय सदस्य मनोनित गर्दा केन्द्रीय कार्यसमितिमा एक तिहाइ महिला पुर्‍याउनुपर्ने कुरालाई मुख्य ध्यान दिनुपर्ने छ । नेपाल समाचारपत्रमा खबर छ ।