बुटवलको ज्योतिनगरमा फेरि पहिरो : ९ घर पुरिए, २० घरमा क्षति

बुटवलको ज्योतिनगरमा फेरि पहिरो : ९ घर पुरिए, २० घरमा क्षति

बुटवलमा सोमवार वर्षा हुँदा फेरि ज्योतिनगरमा पहिरो गएर ९ घर पुरिएका छन् ।


Advertisement

निरन्तर वर्षा भइरहेकाले ज्योतिनगरमा ढुंगा र रूख सहितको लेदो झरिरहेको छ । पहिरोले बुटवलको गोलपार्कदेखि लक्ष्मीनगर जाने सडक समेत बगाएको छ ।


Advertisement

चुरेबाट झरेको पहिरोले ज्योतिनगरमा त्रास फैलिएको छ । यसअघि गत भदौ १३ गतेदेखि ३ दिनसम्म अविरल वर्षा हुँदा ७ घर पुरिनुका साथै २० घरभित्र बस्नै नमिल्ने गरी हिलो सहितको लेदो पसेको थियो ।

ज्योतिनगर बुटवल–३ स्थित चुरेको फेदमा पर्छ । 


Advertisement

ईलाका प्रहरी कार्यालय बुटवलका प्रमुख प्रहरी नायव उपरीक्षक (डीएसपी) मदन कुँवरले ७ घर पुरिएका र १ दर्जनभन्दा बढी घरमा लेदो सहितको पहिरो खसेको लोकान्तरलाई जानकारी दिए ।

चुरेको फेदबाट बाटो बनाउँदा ज्योतिनगर र लक्ष्मीनगर क्षेत्र चिरिएको छ । सोमवार बिहानैदेखि बुटवल तथा आसपासका क्षेत्रमा भारी वर्षा भइरहेको छ । ज्योतिनगरमा धेरै जोखिममा परेका घरका परिवारलाई अन्यत्र सार्ने पहल भइरहेको छ । 

ज्योतिनगर र लक्ष्मीनगरमाथि चुरेको शिरमा ध्वजा फाटेर २०५५ सालदेखि नै पहिरो झर्न थालेको हो । त्यतिबेला पहिरोले झरेर ५७ घरमा क्षति पुगेको थियो । २३ वर्षपछि अहिले फेरि पहिरो झरेपछि स्थानीय त्रसित बनेका छन् ।

पहिरो निरीक्षणमा पुगेको बुटवल उपमहानगरपालिकाका प्रमुख शिवराज सुवेदीलाई आक्रोशित १ युवाले मुक्का समेत प्रहार गरेका छन् । 

पहिरोले सडकमा क्षति पुर्‍याएर आवागमन अवरुद्ध भएको छ भने सडक किनारमा राखिएका बिजुलीका पोल पनि बगाएको छ । बुटवलको शिरमा पर्ने ज्योतिनगरको पहिरो नरोकिए सिंगो बुटवल नै प्रभावित हुने विज्ञले चेतावनी दिएका छन् ।

अनुसन्धानकर्ताले बुटवलसँग जोडिएको चुरे क्षेत्र कमजोर रहेको र भू–स्लखनको समस्या निम्तिने भएकाले फेदीका बस्ती व्यवस्थापन गर्न सुझाएका थिए । राष्ट्रपति चुरे तराई–मधेश संरक्षण विकास समितिले ५ वर्षअघि त्रिविको केन्द्रीय वातावरण विज्ञान विभागसँगको सहकार्यमा २२ जिल्लाका चुरेको पहिरोबारे अध्ययन गरेको थियो ।

समिति कार्यान्वयन एकाइ बुटवलका प्रमुख उपसचिव अजय कार्कीले २५ वर्षअघिको सुझाव सरोकारवाला निकायले कार्यान्वयन नगर्दा भदौ दोस्रो हप्ता बुटवल–३ र ४ मा पहिरोले क्षति गरेको बताए । 

पहिरो प्रभावित क्षेत्रमा उद्धार, पुनःस्थापना र तत्कालीन राहतसहित करीब डेढ करोड बराबरको सुरक्षा प्रबन्ध गरिएको बुटवल उपमहानगरपालिकाले जनाएको छ । रातिदेखि परेको वर्षाले पहिरो खसेर केही घरमा क्षति पुगेको र नाली थुनिएको सूचना पाउनासाथ उपमहानगरका प्राविधिक लिएर प्रमुख शिवराज सुवेदी प्रभावित क्षेत्रमा मेयर पुगेका थिए । त्यही बेला आक्रोशित युवाले मेयर सुवेदीमाथि जाइलागेका थिए । मेयरलाई मुक्का हान्ने पहिरो पीडित गणेश पंगेनी रहेको बताइएको छ । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्